NUR-SULTAN. QazAqparat - Karantındik sharalardyń uzartylýyna baılanysty 3-16 tamyz aralyǵynda 7887 azamatqa múgedektik merzimi avtomatty túrde úsh aıǵa uzartyldy, dep habarlaıdy QazAqparat QR Eńbek jáne halyqty áleýmettik qorǵaý mınıstrliginiń resmı saıtyna silteme jasap.
«Buǵan deıin karantın sharalaryna baılanysty 31 963 qazaqstandyqtyń múgedektik merzimi úsh aıǵa uzartylǵan bolatyn. Bul rette memlekettik járdemaqylardy tóleý buryn belgilengen múgedektik toby boıynsha júzege asyrylady. Sonymen qatar, 16 naýryzdan 7 tamyzǵa deıin 13 509 qazaqstandyq múgedektikti «eGov.kz» portaly arqyly onlaın-rejımde syrttaı rásimdep, merzimin sozdy. Bul múmkindik avtomatty túrde uzartýmen qatar, memlekettik mekemelerde adamdardyń kóp jınalýyn boldyrmaý jáne koronavırýstyq ınfektsııany juqtyrý qaýpin azaıtý maqsatynda múgedektigi bar adamdarǵa berildi. SOVID-19 taralýyna baılanysty shekteý sharalarynyń engizilgen barlyq kezeń ishinde azamattar múgedektikti belgileý jáne kýálandyrýdan qaıta ótý úshin elektrondyq formatta ótinish bere alady», - delingen habarlamada. Sonymen qatar «eGov.kz» portaly arqyly 16 jáne 18 jasqa tolǵan múgedek balalardy syrttaı qaıta kýálandyrýǵa bolady. Olarǵa múgedektigin rastaıtyn qujattar negizinde jáne aldyńǵy kýálandyrýǵa sáıkes múgedektik dárejesin eskere otyryp belgilenedi. Esterińizge sala keteıik, aǵymdaǵy jyldyń shildesinde shekteý sharalarynyń engizilýine baılanysty tabysynan aıyrylǵan 2 mln 257,3 myń qazaqstandyqqa Memlekettik áleýmettik saqtandyrý qorynan 42 500 teńge kóleminde tólem berilgen bolatyn. Al tamyz aıynda karantınniń uzartylýyna oraı, 2 mln 241,6 myń adam 21 250 myń teńge mólsherindegi birjolǵy tólem aldy.
