40 myń teńge úshin jas kelinshekti býyndyryp óltirgen taksı júrgizýshisi sottaldy
ShYMKENT. QazAqparat - Túrkistanda 40 myń teńge nesıesin jabý úshin jas kelinshekti býyndyryp óltirip, máıitin qamystyń arasyna tastap ketken taksı júrgizýshisine qatysty sot úkimi shyqty. Oblystyq qylmystyq ister jónindegi mamandandyrylǵan aýdanaralyq soty aıyptalýshyny 19 jylǵa bas bostandyǵynan aıyrdy, dep habarlaıdy QazAqparat tilshisi.
Sot otyrysy kezinde aıyptalýshy óz qylmysyn tolyqtaı moıyndap, ókinetinin aıtty. Sondaı-aq, marqumnyń týystaryna materıaldyq shyǵyn retinde qarajat bergenin jetkizdi. Dese de, jábirlenýshi tarap sottalýshyny keshirmeıtinin, oǵan aýyr jaza taǵaıyndaýdy surady. Osy isti qaraǵan sýdıa Sammedın Temiralıev túrkistandyq taksı júrgizýshisin Qylmystyq kodekstiń 192-baby 1-shi bóligi («Qaraqshylyq») jáne 99-baby 2-bóligi 10-shy tarmaǵy («Adam óltirý») boıynsha kináli dep taýyp, ony 19 jylǵa bas bostandyǵynan aıyrý jazasyn taǵaıyndady. Jábirlenýshi tarapqa 1 mln teńge kóleminde moraldyq-materıaldyq shyǵyn óteýdi úkim etti. Jazasyn qylmystyq atqarý júıesiniń qaýipsizdigi barynsha joǵary mekemede óteýdi belgiledi.
Esterińizge sala keteıik, qylmystyq oqıǵa osy jyldyń qańtar aıynda oryn alǵan. Túrkistan turǵyny Áıgerim Tasbolatova bankomat kartochkasynan 201 myń teńgesin alýǵa ketip, keıinnen iz-túzsiz joǵalyp ketken bolatyn. Іzdeý sharalary barysynda 24 jastaǵy kelinshektiń máıiti kórshi aýyldaǵy qamystardyń arasynan tabyldy. Tergeý barysynda eki balanyń anasy bankomattan aqsha alǵan sátin jergilikti taksı júrgizýshileriniń biri baıqap qalyp, qalanyń shetine aparyp, qylqyndyryp óltirgeni anyqtaldy. Keıin aqshasy men uıaly telefonyn qoldy etken. Urlanǵan zattardy satyp, bas paıdasyna jaratqan. Artynsha ol satylǵan telefon arqyly tártip saqshylarynyń qolyna túsip, qylmysyn moıyndady. Máıitti ózi taýyp berip, aýyr qylmysty 40 myń teńge kóleminde nesıesin jabý úshin jasaǵanyn aıtqan edi.
