40 myń teńge para alǵan qostanaılyq tergeýshi sottaldy
QOSTANAI. QazAqparat - Qostanaı qalalyq ІІB-niń burynǵy qyzmetkeri para alǵany úshin 2 jylǵa bas bostandyǵynan aıyryldy, dep habarlaıdy «QazAqparat» HAA tilshisi.
Іs materıaldarynda kórsetilgendeı, 2017 jyldyń qarasha aıynda qala turǵyndary Medet Seıilhan men Sábıt Anapın ózderiniń dosyn soqqyǵa jyqqan. Keıinnen jábirlenýshi aýrýhanada kóz jumdy. Іsti tergeý barysynda Qostanaı qalalyq ІІB-niń tergeýshisi Dáýren Núrpeıis Medet Seıilhandy qylmystyq jazadan bosatýǵa ýáde beredi. Óz kezeginde kúdikti tergeýshige 40 myń teńge berýi tıis bolǵan. Núrpeıis kúdiktiden aqshany alý úshin ákesin jumsaǵan. Osylaısha, tártip saqshylary tergeýshiniń ákesin 20 qańtar kúni 40 myń teńge aqsha alyp jatqan jerinen ustady.
Dáýren Nurpeıis sot otyrysynda óz kinásin moıyndady. Aqshany 7 aılyq sábıin emdetý úshin alǵanyn aıtyp, aqtaldy.
Qostanaı qalasy № 2 sotynyń úkimimen burynǵy ІІB-niń qyzmetkeri aıypty dep tanylyp, 2 jylǵa bas bostandyǵynan aıyrý jazasy taǵaıyndaldy. Ol jazasyn qaýipsizdigi ortasha túzetý mekemesinde óteıdi. Ol leıtenant sheninen aıyrylyp, ómir boıy quqyq qorǵaý organdarynda jumys isteý quqyǵynan shettetildi.
