40 myń qazaqstandyq onlaın qyzmetti paıdalanyp, qumar oıynnan bas tartty
ASTANA. KAZINFORM — Qumar oıyndarǵa qatysýdan jáne bás tigýden óz betinshe shekteý jónindegi onlaın qyzmet iske qosylǵan alǵashqy aıda atalǵan qyzmetti 40 myńnan astam el azamaty paıdalanǵan.
Týrızm jáne sport mınıstrliginiń málimetine qaraǵanda 36 765 adam EGOV mobile portaly arqyly onlaın ótinish berse, 3398 adam ózin shekteýge jazbasha ótinish jazǵan.
Sonymen qatar Týrızm jáne sport mınıstrligi osy qyzmetti ilgeriletý úshin áleýmettik jarnama naýqanyn júrgizip jatyr.
Elimizdiń 10 óńirinde 200-den astam banner men bılbord ilindi.
Sondaı-aq Astana, Almaty, Shymkent qalalary men Qyzylorda, Jambyl, Almaty, Abaı, Jetisý jáne Ulytaý oblystarynyń tsıfrly keńseleri men temirjol vokzaldarynda jarnamalyq konstrýktsııalarǵa taqyryptyq bannerler ornalastyrylǵan.
Ótinishti ózin qumar oıyndar men bás tigýden shektegisi keletin adam derbes ETsQ paıdalana otyryp, óz betinshe ótinish berýge tıis.
Úshinshi tulǵalar tarapynan ótinish bere almaıdy.
Esterińizge sala keteıik, atalǵan tsıfrly qyzmetpen qatar el azamattary men rezıdentteri qumar oıyndarǵa qatysýdan jáne bás tigýden ózin shekteý úshin oıyn bıznesin uıymdastyrýshylarǵa jazbasha ótinish bere alady.
