40 myń sheteldik Qazaqstannyń kóshi qon zańnamasyn buzǵan
Jyl basynan kóshi-qon zańnamasyn buzǵan 40 myńǵa jýyq shetel azamaty anyqtaldy, dep habarlaıdy Kazinform.
«2023 jyldyń basynan bastap kóshi-qon zańnamasyn buzǵan 39 881 sheteldik anyqtaldy. Sonyń ishinde 3 730 sheteldikke qatysty Qazaqstan aýmaǵynan tys jerge shyǵarylýy boıynsha sot sheshimi jarııalandy», - delingen Іshki ister mınıstrliginiń Kazinform tilshisine bergen jaýabynda.
Sonymen qatar vedomstvo qos azamattyqpen júrgenderge qandaı jaza qoldanylatynyn túsindirdi.
«Atap aıtqanda, QR Ákimshilik quqyq buzýshylyq týraly Kodeksiniń 496- babyna sáıkes, Qazaqstan Respýblıkasynyń azamattyǵynan aıyrylǵan adamnyń elimizdiń pasportyn jáne jeke kýáligin paıdalanýy jeke tulǵalarǵa bir júz aılyq eseptik kórsetkish mólsherinde aıyppul salýǵa ákep soǵady. Munymen qosa, memlekettik qyzmettegi adamdar, bılik ókiliniń fýnktsııalaryn júzege asyratyn nemese memlekettik organdarda uıymdastyrýshylyq-ókimdik ári ákimshilik-sharýashylyq fýnktsııalardy oryndaıtyn adamdarǵa úsh júz aılyq eseptik kórsetkish mólsherinde aıyppul salynady, sondaı-aq Qazaqstan aýmaǵynan ákimshilik jolmen shyǵaryp jiberýge ákep soǵady», - delingen mınıstrlik málimetinde.
Vedomstvo bıyl qos azamattyqpen júrgen adamdarǵa qatysty kórsetkishter byltyrǵa qaraǵanda artpaǵanyn málim etti.
Budan buryn habarlanǵandaı, 2022 jyly qos azamattyqtyń 841 deregi anyqtaldy. Al bıyl qańtar-qazan aralyǵynda 525 qos azamattyǵy bar adam belgili boldy.
