40 myń esirtki tabletkasy tárkilendi: «Dármek» operatsııasynyń derekteri jarııalandy
ASTANA. KAZINFORM — El aýmaǵynda esirtki quraldarynyń, psıhotroptyq zattar men prekýrsorlardyń, sondaı-aq ýytty jáne kúshti áser etetin zattardyń zańdy aınalymyn baqylaýǵa baǵyttalǵan «Dármek» jedel-aldyn alý is-sharasy ótkizildi. Bul týraly Polisia.kz jazdy.
Esirtki aınalymy salasyndaǵy zańnamany buzǵany úshin Qylmystyq kodekstiń 303-baby boıynsha medıtsına qyzmetkerlerine qatysty 11 qylmystyq is qozǵalyp, 278 ákimshilik quqyqbuzýshylyq anyqtaldy.
Zańsyz aınalymnan quramynda esirtki bar shamamen 7 myń dári-dármek jáne qosarly maqsattaǵy taýarlarǵa jatatyn 80 tonna ýytty zat tárkilendi. Medıtsına salasynda ákimshilik zańnamany buzýdyń 190-nan astam faktisi tirkeldi. 202 medıtsına qyzmetkerine qatysty materıaldar jınalyp, quramynda esirtki bar 40 myńdaı tabletka, 290 myń psıhotroptyq tabletka jáne 236 myń ampýla tárkilendi.
Respýblıka boıynsha barlyǵy 519 medıtsınalyq mekeme tekserildi. Ónerkásip salasynda 60 quqyqbuzýshylyq anyqtalyp, 2 myń tonna prekýrsordyń aınalymyna shekteý qoıyldy, 20 zańdy tulǵa jaýapkershilikke tartyldy. 159 kásiporyn men 734 kólik quraly tekserildi.
Aqtóbe oblysynda tekserý barysynda Qytaıdan temirjol arqyly 80 tonnadan astam ýytty zat memlekettik lıtsenzııasyz ákelingeni anyqtaldy. Tárkilengen zattardyń jalpy quny 86 mıllıon teńge. Bul zat qosarly maqsattaǵy taýarlarǵa jatady. Shyǵys Qazaqstan oblysynda bir JShS-de kúshti áser etetin dárilik zattardyń retseptisiz satylǵany tirkeldi.
«Pregabalın», «Zonıka» jáne «Alısa» dárilerinen 35 myńnan astam tabletka tárkilendi. Batys Qazaqstan oblysynda 40 jastaǵy turǵynnyń úıinen lıtsenzııasyz psıhotroptyq preparattardy zańsyz satý faktisi anyqtaldy. Qaraǵandy oblysynda Astanadan Qaraǵandyǵa baǵyt alǵan avtokólikti tekserý kezinde jalpy quny 240 myń teńgeden asatyn «Tropıkamıd», «Pregabalın» jáne «Medazepam» preparattarynyń 82 qaptamasy tárkilendi.
— Іshki ister mınıstrligi esirtki quraldary, psıhotroptyq zattar, prekýrsorlar men ýytty zattardyń zańdy aınalymy salasyndaǵy zańnamany buzǵany úshin ákimshilik jáne qylmystyq jaýapkershilik qarastyrylǵanyn eskertedi. Bul baǵyttaǵy jumys azamattardyń qaýipsizdigin qamtamasyz etýge jáne «Zań men Tártip» qaǵıdatyn nyǵaıtýǵa baǵyttalǵan, — dedi ІІM esirtki qylmysyna qarsy is-qımyl komıtetiniń basqarma bastyǵy Baqytjan Ámirhanov.
Eske sala keteıik, buǵan deıin Aqtóbede psıhotropty dárilik zattardy zańsyz satqandar ustalǵanyn jazǵan edik.