40 myń adam jáne 100 tonna qoqys: Astanadaǵy «Taza aýla» aktsııasy qalaı ótti
ASTANA. KAZINFORM – Elordada «Taza Qazaqstan» jalpyulttyq bastamasy aıasynda qala aýmaǵyn sanıtarlyq tazartý men abattandyrýǵa baǵyttalǵan «Taza aýla» ekologııalyq aktsııasy ótti, dep habarlaıdy qala ákimdiginiń resmı saıty.
Ekologııalyq is-shara elordanyń barlyq aýdanyn qamtydy. Oǵan 40 myńǵa jýyq adam qatysty. Atap aıtqanda, qala turǵyndary, mádenıet qaıratkerleri, qarjy sektorynyń ókilderi, qurylys kompanııalary, qoǵam belsendileri, kásiporyn qyzmetkerleri, MIB/PIK birlestikteri, shaǵyn jáne orta bıznes, eriktiler, stýdentter jáne belsendi azamattar atsalysty.
Bul jumysqa 900-den astam arnaıy tehnıka jumyldyryldy. Aktsııa barysynda sanıtarlyq tazalaý, abattandyrý jáne kógaldandyrý jumysy júrgizildi. Qatysýshylar aýlalardy, kóshelerdi, saıabaqtar men qoǵamdyq keńistikterdi retke keltirdi.
Aýqymdy is-shara nátıjesinde 1 560 aýla tazartyldy. Onyń ishinde kópqabatty turǵyn úıler men jeke sektor aýlalary bar. Sonymen qatar 491 aıaldama pavılony jýylyp, qala aýmaǵynan shamamen 100 tonna qoqys shyǵaryldy.
Іs-sharanyń basty maqsaty – ekologııalyq mádenıetti qalyptastyrý, turǵyndardyń qorshaǵan orta tazalyǵyna jaýapkershiligin arttyrý jáne olardy abattandyrý jumysyna tartý.
Árbir turǵyn men uıym kósheler men aýlalardy kórkeıtýge úles qosyp, Astanany taza, jaıly ári ekologııalyq qalaǵa aınaldyra alady.
Buǵan deıin habarlaǵanymyzdaı, Astanada jasyl aımaqtardyń quqyqtyq mártebesi ózgeredi.
