40-qa jýyq TKSh kásiporyny negizsiz 3 mlrd. teńgeden astam somaǵa tarıfti kóterip jibergen - QR Bas prokýratýrasy

ASTANA. QazAqparat - Prokýratýra organdary sońǵy úsh jylda kommýnaldyq saladaǵy tarıfterdi bekitý kezinde tabıǵı monopolııalar týraly zańnamanyń qoldanylýyna tekseris júrgizdi.

Tekseris barysynda ýákiletti organdardyń qyzmeti, sondaı-aq kommýnaldyq qyzmetterdi kórsetetin sýbektiler qamtylǵan.

Júrgizilgen tekseris sharalarynyń qorytyndysy boıynsha belgilengen tártipte tarıfterdi bekitpeı halyqqa qyzmet kórsetken 200-ge jýyq kásiporyn anyqtaldy.

Mysaly, Jetigen aýylynda (Almaty oblysy, Іle aýdany) 950 abonentke qyzmet kórsetetin «Jetigen» JK sýmen jabdyqtaý jáne sý tartý qyzmetterin usyný boıynsha áreketterdi júzege asyrady. Alaıda JK jergilikti Tabıǵı monopolııalar sýbektileriniń memlekettik tirkelimi bóliminde tirkelmegen, osynyń saldarynan bekitilmegen tarıftermen óz qyzmetterin kórsete otyryp, ol tabıǵı monopolııalar týraly zańnamanyń talaptaryn buzǵan.

Dál sondaı tirkelimge engizilmegen sýbektilerdiń qyzmetterdi iske asyrý faktileri Almaty (20), Batys Qazaqstan (20), Aqtóbe (3), Qaraǵandy (2), Shyǵys Qazaqstan (1) oblystarynda jáne kólik salasynda (146) anyqtaldy.

Tarıftik smetalar men ınvestıtsııalyq mindettemelerdiń oryndalýyn tekserý kezinde 40-qa jýyq sýbektilerdiń 3 mlrd. teńgeden astam somaǵa kommýnaldyq qyzmetterge tarıfterdi negizsiz kóterip jiberý buzýshylyqtary anyqtaldy.

Osylaısha, «Taýsamaly» kommýnaldyq kásiporny (Almaty oblysy) sýmen qamtamasyz etý boıynsha joǵarylatylǵan tarıftermen qyzmetter kórsetken. Tek 66 kún ishinde kásiporyn 1,8 mln. teńge kóleminde negizsiz paıda tapqan. Prokýratýranyń aktisi boıynsha ótemdik tarıf ornatyldy.

Qaraǵandy oblysynyń Keńgir aýylyn sýmen jabdyqtaý qyzmetin usyný kezinde 27,2 mln. teńge soma kóleminde negizsiz paıda tapqan «Qalalyq avtojoldardy basqarý» QMK-niń tarıfin qaıta qaraý týraly másele qoıyldy.

Jalpy, 1 mln. tutynýshynyń tarıfin qaıta esepteý jáne shyǵynyn qaıtarý, sondaı-aq tabıǵı monopolııalar sýbektileri men domınanttardy ákimshilik jaýapkershilikke tartý týraly talaptarymen Qazaqstan Respýblıkasy Ulttyq ekonomıka mınıstrligi Tabıǵı monopolııalardy retteý jáne básekelestikti qorǵaý komıtetiniń aýmaqtyq bólimshelerine anyqtalǵan zań buzýshylyqtar jóninde usynys engizildi, dep habarlaıdy QR Bas prokýratýrasynyń baspasóz qyzmeti.