40 ınsýlttik ortalyq ólim-jitimniń turaqty túrde tómendeýine yqpal etýde
ASTANA. QazAqparat - Elimizde 2015 jyldyń birinshi toqsanynda 5 radıatsııalyq ortalyq ashý josparlanǵan. Qazirgi ýaqytta 26 trassalyq medıtsınalyq-qutqarý tirekteri qyzmet etýde. Sonymen birge qan aınalymy júıesi aýrýlarynan, onkologııa jáne jaraqattanýshylyqtan bolatan ólim-jitim turaqty túrde tómendeýine 40 ınsýlttik ortalyqtyń ashylýy, joǵary tehnologııalyq radıatsııalyq onkologııa ortalyqtary jelisiniń damýy ıgi áser etip otyr.
Bul týraly QR DSÁD mınıstrliginiń baspasóz qyzmeti habarlady. Mınıstrliktiń málimetinshe 2014 jylǵy esep boıynsha balalar ólimi kórsetkishteri 16,4-ke, náresteler ólimi kórsetkishi 14,6-ǵa deıin tómendegen. Osylaısha, Qazaqstan atalǵan salada Myńjyldyqtyń damý kórsetkishterine belgilengen merzimnen buryn qol jetkizdi. Búkilálemdik bank bul jetistikterdi resmı derekqoryna engizip, balalar ólimi kórsetkishi boıynsha Jahandyq básekege qabilettilik ındeksinde Qazaqstannyń ustanymy eleýli túrde jaqsardy.
Dúnıejúzilik densaýlyq saqtaý uıymynyń málimetinshe, adam densaýlyǵyna eń aldymen onyń ómir súrý salty, tuqym qýalaýshylyq jáne qorshaǵan ortasy áser etedi.
Osyǵan baılanysty óńirlik densaýlyq saqtaý máselesi asa kóńil bólýdi talap etedi, sondyqtan Membaǵdarlamanyń negizgi mindetteriniń biri qarjylandyrýdy, medıtsınalyq kómekti óńirlik teńestirý, qazaqstandyqtardyń sapaly jáne joǵary tehnologııalyq medıtsınalyq kómekke ádil qol jetkizýin qamtamasyz etý bolyp tabylady.
Osyǵan oraı qajetti is-sharalar qabyldap, minez-qulyq táýekel faktorlaryn (temeki shegý, ishikdikti asyra paıdalaný, tómen dene belsendiligi, durys emes tamaqtaný); ekologııalyq faktorlardyń densaýlyqqa áserin tómendetý; taza aýyz sýǵa qoljetimdilikti qamtamasyz etý; undy dárýmendik-mıneraldyq keshenmen baıytý; reprodýktıvtik densaýlyqty saqtaý máseleleri boıynsha arnaýly bilim berý baǵdarlamalaryn ázirleý; olardy mektepke deıingi, orta, joǵary jáne arnaýly orta bilim berý júıelerine yqpaldastyrý; 5 jasqa deıingi balalar arasyndaǵy árbir bes ólimniń birine sebep bop otyrǵan balalar jaraqattanýshylyǵyn tómendetý; densaýlyqty saqtaý jáne nyǵaıtý, durys tamaqtaný máseleleri boıynsha halyqtyń habardarlyǵyn arttyrý; turǵyndardyń sport keshenderine qoljetimdiligin qamtamasyz etý; buqaralyq sportty damytý; úkimettik emes uıymdardy tartý baǵytynda sektoraralyq ózara is-árekettestikti arttyrý kerek.
Bul is-sharalardyń barlyǵy ári qaraı da Ǵalamdyq básekege qabilettilik ındeksi reıtınginde kórsetkishterdi jaqsartýǵa múmkindik beredi delingen mınıstrliktiń baspasóz qyzmetiniń habarlamasynda.
