+40 gradýsqa deıingi aptap, naızaǵaı: 15 oblysta daýyldy eskertý jarııalandy

ASTANA. KAZINFORM — 8 tamyz kúni Qazaqstannyń 15 óńirinde, sondaı-aq Astana men Shymkent qalalarynda daýyldy eskertý jarııalandy. Bul týraly «Qazgıdromet» RMK málim etti.

Astanada naızaǵaı kútiledi. Soltústik-shyǵystan soǵatyn jel keı kezderi 15-20 m/s jyldamdyqpen soǵady.

Shymkentte órt qaýpiniń joǵary deńgeıi saqtalyp otyr.

Abaı oblysynyń batysynda, soltústiginde jáne ortalyǵynda naızaǵaı, kúndiz burshaq kútiledi. Jel ońtústik-shyǵystan soltústik-batysqa aýysady, batysta, soltústikte jáne ortalyqta kúndiz 15-20 m/s jyldamdyqpen soǵady. Ońtústikte jáne ortalyqta tótenshe órt qaýpi saqtalady.

Aqmola oblysynyń batysynda, ońtústiginde jáne shyǵysynda naızaǵaı, kúndiz burshaq, daýyldy jel kútiledi. Túnde jáne tańerteń batysynda, soltústiginde jáne ońtústiginde tuman bolady. Jel soltústik-shyǵystan soǵady, ekpini 15-20 m/s.

Aqtóbe oblysynyń soltústigi men shyǵysynda naızaǵaı bolady. Jel batystan, soltústik-batystan, shyǵysta kúndiz ekpini 15-18 m/s. Ońtústikte aptap ystyq – 37°S. Batysta jáne ońtústik-shyǵysta joǵary órt qaýpi saqtalady, ońtústiginde – tótenshe órt qaýpi.

Atyraý oblysynda kúndiz 35-38°S aptap ystyq kútiledi. Oblystyń shyǵysynda tótenshe, al soltústigi, ońtústigi men batysynda joǵary órt qaýpi bar.

Shyǵys Qazaqstan oblysynyń batysy, soltústigi jáne shyǵysynda naızaǵaı, kúndiz burshaq. Jel ońtústik-shyǵystan soltústik-batysqa aýysyp, kúndiz soltústikte, shyǵysta jáne ońtústikte 15-20 m/s.

Jambyl oblysynyń taýly aýdandarynda naızaǵaı bolady. Jel soltústik-shyǵystan soltústik-batysqa aýysyp, taýly aımaqtarda ekpini 15-20 m/s. Soltústigi, batysy jáne shyǵysynda tótenshe, al ońtústigi men ortalyǵynda joǵary órt qaýpi bar.

Batys Qazaqstan oblysynda jel soltústik-batystan, batystan, soltústigi men shyǵysynda 15-20 m/s. Kúndiz 35°S aptap ystyq. Batysy, ońtústigi, soltústigi jáne shyǵysynda joǵary órt qaýpi saqtalady.

Qaraǵandy oblysynyń batysy, shyǵysy jáne soltústiginde jańbyr, naızaǵaı, kúndiz burshaq, daýyl kútiledi. Jel ońtústik-batystan soltústik-batysqa aýysyp, tańerteń jáne kúndiz 15-20 m/s. Ońtústikte tótenshe órt qaýpi saqtalady.

Qostanaı oblysynyń batysy, shyǵysy jáne ońtústiginde naızaǵaı, kúndiz burshaq. Túnde jáne tańerteń soltústigi men ońtústiginde tuman. Jel soltústik-shyǵystan soǵyp, 15-20 m/s. Ońtústikte tótenshe órt qaýpi saqtalady.

Qyzylorda oblysynyń ortalyǵy men soltústiginde shańdy daýyl. Jel batystan, 15-20 m/s. Kúndiz 40-41°S aptap. Ońtústik bóliginde tótenshe, soltústik bóliginde joǵary órt qaýpi.

Mańǵystaý oblysynyń soltústik-batysynda naızaǵaı. Jel soltústik-shyǵystan soltústik-batysqa aýysyp, 15-18 m/s. Kúndiz 38-40°S aptap. Óńirde tótenshe órt qaýpi saqtalady.

Pavlodar oblysynyń batysy, soltústigi jáne shyǵysynda túnde jańbyr, daýyl, naızaǵaı. Jel soltústik-shyǵystan, 15-20 m/s.

Soltústik Qazaqstan oblysynyń soltústigi, shyǵysy jáne ońtústiginde naızaǵaı, kúndiz burshaq. Túnde jáne tańerteń shyǵysy men ońtústiginde tuman. Jel soltústik-shyǵystan, túnde jáne kúndiz 15-20 m/s.

Túrkistan oblysynda kúndiz taýly asýlarda jel soltústik-batystan 15-20 m/s. Oblys boıynsha tótenshe órt qaýpi saqtalady.

Ulytaý oblysynyń soltústigi men shyǵysynda tańerteń jáne kúndiz naızaǵaı. Jel ońtústik-batystan, batystan, soltústigi, shyǵysy men ortalyǵynda 15-20 m/s. Kúndiz 35-36°S aptap. Ońtústiginde tótenshe, ortalyǵynda joǵary órt qaýpi saqtalady.

Eske sala keteıik, buǵan deıin elimizdiń ońtústiginde aptap ystyq qaıta bastalǵanyna baılanysty mańyzdy aqparat jarııalandy. QazAvtoJol kompanııasynyń mamandary +30°C jáne odan joǵary aýa temperatýrasy kólik qozǵalysy úshin qaýip tóndiretinin eskertip, júrgizýshilerge jolǵa shyǵar aldynda nazar aýdaratyn mańyzdy keńester usyndy.