40 gradýs ystyq: Shymkenttik dárigerler kúsheıtilgen rejımge kóshti

ShYMKENT. QazAqparat - Shymkenttik dárigerler aptap ystyqqa baılanysty kúsheıtilgen jumys tártibine kóshti, dep habarlaıdy QazAqparat tilshisi.

Qalada aptap ystyqtyń beti qaıtar emes. Turǵyndar sý burqaqtar pen ózen-kól jaǵasyn panalaýǵa májbúr. Sondaı-aq, qatty ystyqtan júrek-qantamyrlary aýyratyndardyń qatary artyp, jedel járdem qyzmetine júginýshiler sany kóbeıgen.

«Basqa aılarda bir jarym myńǵa deıin shaqyrtýlar bolsa, qazirgi ýaqytta 2 myńnan asyp ketti. Osyǵan baılanysty biz shaqyrtýlar qabyldaıtyn dıspetcherlar men jedel járdem kólikteriniń sanyn ulǵaıttyq», - deıdi Shymkent qalalyq jedel medıtsınalyq kómek kórsetý stansasynyń bas dárigeri Gúlnár Qurmanbekova.

Shymkentte búgin de kún 40 gradýstyń ústine kóterilip, jurtty ábigerge túsirdi. Sınoptıkter mundaı jaǵdaı Túrkistan oblysynda da saqtalatynyn aıtady.

«Túrkistan oblysynyń basym bóliginde qatty ystyq +40+43 gradýs kútiledi. Shymkent qalasynda da kún qatty ysıdy»,- deıdi sınoptık Ásem Nurlybaeva.