40 eldi meken úshin sý tasqyny qaýpi tómendetiledi - Serikqalı Brekeshev
«Kanaldardy rekonstrýktsııalaý máselelerine toqtalsaq, búgingi kúni sýarý júıesinde uzyndyǵy 21,5 myń shaqyrym shamamen 3,5 myń magıstraldyq jáne sharýashylyqaralyq kanal bar. Olardyń 55% (11,8 myń km) qanaǵattanarlyqsyz jaǵdaıda. Bul sońǵy tutynýshylarǵa deıin sýdy tasymaldaý kezinde joǵary shyǵyndardyń negizgi sebebi bolyp otyr», - dedi S. Brekeshev.
Onyń aıtýynsha, 2025-shi jylǵa deıin 7 oblysta uzyndyǵy 2,3 myń kılometr bolatyn 120 sýarý kanalyn kezeń-kezeńmen rekonstrýktsııalaý jáne qalpyna keltirý josparlanǵan. Bul 2025-shi jylǵa qaraı sýarmaly alqapty 2,2 mıllıon gektarǵa deıin jetkizýge jáne sýarmaly sýdyń shyǵynyn jyl saıyn 800 mıllıon tekshe metrge tómendetýge múmkindik beredi.
«Oblystar bólinisinde rekonstrýktsııalaýdy qajet etetin kanaldardyń basym bóligi elimizdiń ońtústik óńirlerinde ornalasqan. Aldyn ala esepteýlerge sáıkes, tolyq rekonstrýktsııalaýdyń jalpy quny 205 mıllıard teńgeni quraıdy. Onyń ishinde jobalaý-smetalyq qujattamaǵa 6,8 mıllıard teńge qajet. Sondaı-aq, 34 mıllıard teńge mólsherinde memlekettik-jekeshelik áriptestik arqyly bıýdjetten tys qarajatty tartý josparlanýda», - dedi mınıstr.
Onyń sózine qaraǵanda, qazirgi ýaqytta 41 avarııalyq sý qoımasy men gıdrotehnıkalyq qurylystardy (GTQ) rekonstrýktsııalaý júrgizilip jatyr. Sońǵy 5 jyl ishinde 15 joba paıdalanýǵa berildi. Jeteýin kelesi jyldyń sońyna deıin, al qalǵan 19-yn 2025 jyldyń sońyna deıin tapsyrý josparlanyp otyr.
«Jasyl Qazaqstan» ulttyq jobasy aıasynda respýblıkalyq bıýdjetten jalpy quny 30 mlrd teńgeden 20 mlrd teńge (16 obekt) qoldaý tapty. Avarııalyq qurylystardy qaıta jańartýdy aıaqtaý úshin qosymsha 10 mlrd teńge mólsherinde qarajat qajet.
«Osy jobalardy iske asyrý nátıjesinde sýdy 1,2 tekshe kılometrge deıin jınaqtaýǵa múmkindik týady jáne jalpy sany 300 myń adamy bar 40 eldi meken úshin sý tasqyny qaýpin qosymsha tómendetedi», - dedi vedomstvo basshysy.
