40 balalar ombýdsmeni mektep oqýshylarynyń múddesin respýblıkalyq deńgeıde qorǵaıdy

ASTANA. KAZINFORM — Elimizde mektep parlamentteri men balalar qozǵalysynyń kóshbasshylary arasynda balalar ombýdsmenderin saılaý ótti. Bul týraly Oqý-aǵartý mınıstrliginiń baspasóz qyzmeti habarlady.

Іrikteý nátıjesinde Respýblıkalyq keńes quramyna elimizdiń túkpir-túkpirinen 40 jas quqyq qorǵaýshy qabyldandy. Endi olar Qazaqstannyń barlyq óńirinde oqýshylardyń quqyqtary men zańdy múddelerin qorǵaýǵa atsalyspaq.

Balalar ombýdsmenderi — bala men memleket arasyndaǵy senimdi dáneker. Jastar óz zamandastarynyń quqyǵyn qorǵaýǵa baǵyttalǵan ózekti máselelerdi kóterip, olardyń sheshilýine yqpal etedi, áleýmettik bastamalardy qoldaıdy, balalardyń qoǵamdyq ómirge belsendi aralasýyn nasıhattaıdy. Sonymen qatar, jas ombýdsmender bala múddesin eskeretin memlekettik saıasatty qalyptastyrý boıynsha usynystar ázirleıdi.

Basty nazar — balalardyń ózin-ózi basqarý daǵdylaryn damytýǵa, quqyqtyq sana men azamattyq jaýapkershilikti qalyptastyrýǵa, sondaı-aq bala quqyqtaryn qorǵaý salasyndaǵy halyqaralyq áriptestikti nyǵaıtýǵa baǵyttalǵan.

— Biz úshin ár balanyń óz taǵdyryna qatysty sheshimderge ún qosyp, yqpal ete alýy asa mańyzdy. Balalar ombýdsmenderi — balanyń úni estilip qana qoımaı, eskeriletin júıeniń ajyramas bólshegi. Biz olardy balalardyń quqyqtaryn qorǵaýdaǵy senimdi seriktesterimiz dep bilemiz. Óıtkeni olardyń kómegimen biz balalardyń kózqarasyn tereńirek túsinip, shynaıy ári naqty sheshimder qabyldaı alamyz, — dep atap ótti Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.

Eske sala keteıik, balalar ókildigi ınstıtýty óz qyzmetin 2020 jyldan beri atqaryp keledi. Jyl saıyn elimizdiń barlyq bilim berý uıymynda ótetin balalar ombýdsmenderiniń saılaýy búginde balalardyń quqyqtaryn qorǵaý júıesiniń mańyzdy bóligine aınaldy.

Aıta ketelik býllıng, kıberbýllıng: 111 nómirine balalar kóbine qandaı máselelermen habarlasqany týraly jazǵan edik.