40 adamnyń ómirin qıǵan órt: kýrorttaǵy barda baqylaý bolmaǵan
ASTANA. KAZINFORM — Shveıtsarııanyń Kran-Montana taý shańǵysy kýrortyndaǵy Le Constellation barynda 2020 jyldan beri órt qaýipsizdigi tekserilmegen, dep habarlaıdy Anadoly.
Jańa jyl túni órt shyǵyp, 40 adam qaza tapqan Shveıtsarııanyń Kran-Montana taý shańǵysy kýrortyndaǵy Le Constellation barynda 2020 jyldan beri órt qaýipsizdigine qatysty tekserý júrgizilmegen.
Bul týraly baspasóz máslıhatynda jergilikti bılik ókilderi málimdedi.
Olar budan bylaı kýrort aýmaǵynda bengal ottaryn paıdalanýǵa tyıym salynǵanyn atap ótti.
Prokýratýranyń málimetinshe, órt bengal ottarynan shyqqan ushqyndardyń tóbege tııýinen tutanýy múmkin, tóbe porolonmen qaptalǵan.
Kran-Montana qalasynyń meri Nıkolıa Fero mekemeniń ne sebepti uzaq ýaqyt boıy tekserilmegenin túsindire almaıtynyn aıtty.
Ol qala bıligi bolǵan oqıǵaǵa baılanysty «ókinish bildiretinin» jetkizdi.
Órt saldarynan 40 adam qaza taýyp, taǵy 119 adam aýyr kúıik pen adam kóp jınalǵan kezdegi dúrbeleńnen alǵan jaraqattarymen aýrýhanaǵa jetkizildi.