4 jyldan keıin Qazaqstanda 100-ge jýyq joǵary oqý orny qalady - Bilim jáne ǵylym mınıstri
ASTANA. 6 jeltoqsan. QazAqparat /Rýslan Ǵabbasov/ - 4 jyldan keıin Qazaqstanda 100-ge jýyq joǵary oqý orny qalady.
Búgin Úkimet otyrysynan keıin jýrnalıster saýalyna jaýap berý kezinde Bilim jáne ǵylym mınıstri Baqytjan Jumaǵulov osylaı aıtty.
«3-4 jyldan keıin elimizde 100-ge tarta oqý oryndary qalady. Bul álemdik tájirıbege saı úrdis»,-dedi mınıstr. Vedomstvo basshysynyń sózine qaraǵanda, búginde Qazaqstanda 148 joǵary oqý orny bar. Alaıda mınıstr osy oqý oryndarynyń barlyǵy birdeı sapaly bilim berip otyrǵandyǵyna kúmándanatynyn aıtty.
Bul turǵyda B. Jumaǵulov bıyldyń ózinde 12 joǵary oqý orny qysqaratynyn jáne bul jumystar kezeń-kezeńmen jalǵasatynyn jetkizdi. Al aldaǵy jyly taǵy 20 joǵary oqý orny qysqarady nemese kolledjderge aýystyrylady.
