4 jyldan beri oraza ustaımyn, qara jorǵa bıin de úırenip aldym - Mıhaıl Krokýs
TÚRKІSTAN. QazAqparat – Arys qalasynyń turǵyny Mıhaıl Krokýs ulty orys bolsa da qazaq tilinde múdirmeı sóılep, kópke úlgi bolyp júr. Tipti, óleń shyǵaryp, qarajorǵa bıleıtin óneri de bar. Odan bólek, 4 jyldan beri oraza ustap, juma saıyn meshitke baryp turady, dep habarlaıdy QazAqparat tilshisi.
Joldastary men tanystary Mıhaıldi Mádı dep atap ketken. Ol «Qarajorǵa» bıin óziniń qyzyǵýshylyǵymen meńgeripti. Teledıdardan kásibı bıshilerdiń is-qımylan qarap otyryp úırengen. Al, qazaq tilin ósken ortasy qalyptastyrǵan. Kishkentaıynan qazaq otbasynyń balalarymen dos bolǵan ol, birge oınap, balalyq shaqty birge ótkizgen.
«1998 jyly dúnıege keldim. 9-synypqa deıin Leńgir qalasyndaǵy qazaq mektebinde bilim aldym. Al, keıinnen Arysqa qonys aýdaryp, osyndaǵy orta mektepti bitirdim. Qazir eki tilde de erkin sóıleımin», - deıdi ol.
Mıhaıl Krokýs — ІІM-ge qarasty Almaty akademııasynyń túlegi. Eńbek jolyn Arys qalalyq polıtsııa bóliminde «jedel áreket etý» bóliminde bastaǵan. Al, qazir ýchaskelik polıtsııa ınspektory qyzmetin abyroımen atqaryp júr.
«Aýmaǵymda 3000-ǵa jýyq halyq bar. Mektep, toıhana, dúken jáne ózge de áleýmettik nysandar men kásipkerlik qurylymdar ornalasqan. Tańerteń ertemen kósheni aralap, aqsaqaldarmen kezdesemin. Qoǵamdyq tynyshtyqty saqtaý maqsatynda qyzmet etip kelemin», - deıdi leıtenant.
Mıhaıl bir jyl ishinde 10-ǵa jýyq qylmystyń ashylýyna uıytqy bolypty. Máselen, úıine ury túsken turǵynnyń aryzymen jumys istep, sol kúni ashypty. Bazardaǵy oryn alǵan urlyq jaıty boıynsha da dereý áreket etip, kúdiktini kóp uzamaı qolǵa túsirgen.
Sondaı-aq, Mıhaıl mádenı sporttyq is-sharalarǵa da únemi qatysyp otyrady. Oblystyq «Parasatty polıtseı» baıqaýynda bas júldeni jeńip alǵan ol, respýblıkalyq saıysta úshinshi oryndy enshilepti.
«Jýyrda Astana qalasynda ótken «Tatýlyq – táýelsizdiktiń tiregi» atty respýblıkalyq saıysqa qatystym. Memlekettik tildi meńgergen ózge ult ókilderine qoldaý kórsetý, memlekettik tildi nasıhattaýmen qatar ishki ister organdarynda tildik ortany qalyptastyrý maqsatynda ótken baıqaýǵa 19 polıtsııa qyzmetkeri qatysty. Sonda ózim shyǵarǵan óleńmen tanystyrýymdy aıtyp, qarajorǵa bıledim. Kórermen kóz aıymyna aınalyp, ІІM «Alǵys hatymen» marapattaldym», - deıdi ol.
Jýyrda Mıhaıl otbasyn qurdy. Búginde jubaıy Aıdana ekeýi alǵashqy sábılerin kútip otyr.
