4 jyl velosıpedpen saıahattap júrgen ıspandyq kelinshek Jetisýǵa jetti
TALDYQORǴAN. QazAqparat - Ispandyq Rosıo Oteranyń álem boıynsha saıahaty jetisýlyqtardy tańǵaldyrdy. Sheteldik qonaq ózge týrıster syndy qonaqúı izdep sabylmaıdy. Kersinshe, kez kelgen jerge shatyryn quryp, túnep, alańsyz saıahatyn jalǵastyrýda, dep habarlaıdy QazAqparat tilshisi.
Rosıo úshin qazir eń qajetti úsh zat bar, ol - velosıped, planshet jáne shatyr. Dál osy úsheýi saparynyń oıdaǵydaı jalǵasýyna sep bolyp otyr eken.
«Planshetimde ınternet ustamaı qalǵanda árıne qatty ýaıymdaımyn. Sebebi, men ózimniń qaı jerde júrgenimdi jáne jaqyn jerde qandaı aýyl, qala bar ekenin ınternet arqyly bilip otyrmyn. Kesh qaraıǵansha eldi-mekenderge jetýge tyrysamyn. Kez kelgen úıdiń aýlasyna kirip, dalada shatyrymdy quryp túneýge ruqsat suraımyn. Qarajatymdy únemdeý úshin shatyrda túneı beremin. Qoryqpaımyn. Árıne, tańyrqap qaraıtyndar óte kóp. Biraq, qazaqtar óte qonaqjaı halyq eken. Dastarhan jaıyp, qurmetteıtinder de bolady», - deıdi Rosıo.
Ispandyq týrıst tórt jyldan beri osylaısha saıahatyn jalǵastyrýda. Ol Japonııadan 2013 jyly Indonezııaǵa ushaq arqyly jetken. Naqty velosıpedpen saıahatty osy Indonezııa jerinen bastaǵanyn aıtady. Al Qazaqstanǵa Qytaı eli arqyly kelgen.
«Osy tórt jyl ishinde birneshe elde boldym. Barlyǵyn tek velosıped arqyly aralap júrmin. Osyndaı saıahat jasaý úshin kóp jyldar boıy daıyndaldym. Kóptegen eldiń kórikti jerlerin kórdim, tarıhymen, mádenıetimen tanystym. Qazir barlyǵy oıdaǵydaı jalǵasýda», - deıdi ol.
Qys mezgilinde jyly aımaqtarǵa baǵyt buratynyn aıtqan týrıst, Qazaqstannan keıin Qyrǵyzstan, Ózbekstanǵa barýdy josparlap otyrǵanyn jetkizdi.
Rosıo otbasynda jalǵyz bala eken. Ispanııadaǵy ata-anasymen únemi baılanysta ekendigin aıtady. Japonııada bes jyl boıy muǵalim bolyp istegen 38 jastaǵy týrıst ázirge turmysqa shyǵýdy josparlamaıdy.
