4 jyl ótti: Shahan kenti qaıǵyly oqıǵadan keıin ortalyq jylýǵa qosylady
QARAǴANDY. QazAqparat – Qaraǵandy oblysynyń Shahan kentinde ortalyq qazandyq salynyp jatyr. Osylaısha turǵyndardyń kópqabatty úılerdegi peshterden arylý týraly kópjyldyq armany oryndalady, dep habarlaıdy QazAqparat tilshisi.
Úılerdi ortalyq jylýǵa qosýdyń qandaı sheshimi tabylǵany jaıly kent ákimi Ǵalym Ómirbekov aıtyp berdi.
«Kópqabatty úılerdi «Turǵyn úı-kommýnaldyq sharýashylyǵyn jańǵyrtý jáne damytýdyń qazaqstandyq ortalyǵy» arqyly qosý josparlanýda. Turǵyndarǵa 7 jylǵa deıingi merzimge jyldyq 0,1% jeńildikpen nesıe ala alatyn nesıeleý baǵdarlamasyna qatysý usynyldy. Biz barlyq úılerdi aralap, adamdarǵa jaǵdaıdy túsindirdik. Kópshilik osy nusqany qalaıtynyn aıtty. Turǵyndar qujattar jınaı bastady. Biz qujattardyń tolyq paketin qabyldap, keıin TKSh jańǵyrtý ortalyǵyna beretin bolamyz», – dedi ol.
Esepteýler boıynsha, bir páterden aı saıynǵy tólem shamamen 5000-6000 teńgeni quraıdy. Baǵdarlamaǵa qatysý úshin úıdegi páter ıeleriniń 70% kelisimi qajet.
Shahanda 116 kópqabatty úıdiń 21-i modýldik qazandyqtarmen jylytylady. Olarda ortalyq jylytýǵa kóshý úshin tek elevatordy ornatý kerek. Sondyqtan shyǵyndar az bolady. Qalǵan quny úıdiń qabattaryna baılanysty ózgeredi – bir páterden 100-den 500 myń teńgege deıin.
«Árıne, bul somany birden tóleýge kóptegen adamnyń múmkindigi joq. Bizge qulaq túrgenderińiz úshin, sheshim tapqandaryńyz úshin rahmet. Mundaı sharttarmen beriletin nesıe – bizderge qolaıly. Birtindep tóleı alamyz: bireý jeti jyl, bireý merziminen buryn. Bul zeınetkerler úshin, jas otbasylar úshin artyq bolmaıdy. Men bul jerde týǵanymnan beri turamyn, biraq kúıeýimmen birge kóshý týraly oılana bastaǵan edik. Bizdiń úıde modýldik qazandyq joq. Pesh óte yńǵaısyz. Kómirdi jınap, kúldi shyǵaramyz. Jumystan kelgen bette, birinshi kezekte qazandy qyzdyrýǵa kirisemiz. Demalys joq. Ortalyq jylytý qosylǵanda kóretin artyqshylyqtyń biri - kómir shańymen dem alýdyń qajeti joq, tazalyq, jaılylyq pen yńǵaılylyq bolady», – dep esepteıdi Shahan turǵyny Stefanıda Pıanyh.
Kenttik ákimdikke shart jasasý úshin qujattar tapsyrylyp jatyr.
Kent ákiminiń aıtýynsha, ortalyq jylý tarıfi Shahtınsk qalasyndaǵydaı bolady. Nysandy tapsyrǵannan keıin qazandyqty Shahtınsk JEO-nyń teńgerimine berý josparlanýda.
Qazir qazandyq 80 paıyzǵa daıyn. Jabdyqtar tolyq ornatylǵan. Tehnologııa jańa: qazandyqtar kez kelgen túrdegi kómirmen jumys isteı alady.
Merdiger «Mehanomontaj-2004» kentke magıstraldyq qubyr salady. Nysandy qyrkúıek aıynda tapsyrý josparlanǵan. Jańa jylytý maýsymynda shahandyqtar peshpen jáne kómirmen qoshtasa alady.
Eske salaıyq, 2017 jyldyń 1 qańtary Qaraǵandy oblysynyń Shahan kentinde kópqabatty úı opyrylyp qulady. Úıindiler astynan 9 adamnyń máıiti tabyldy.
Úıdiń qulaýyna 4-shi podezdiń jertólesinde ornalasqan qazandyqtyń jarylýy sebep bolǵan.
