«4 jyl ákemdi izdedim»: Astana polıtseıleri joǵalǵan adamdy tapty
ASTANA. QazAqparat - Astana polıtseıleri patrýldeý kezinde birneshe jyl buryn joǵalǵan adamdy tapty, – dep habarlaıdy Polisia.kz.
Tańerteńgi saǵat 08.00 shamasynda Patrýldik polıtsııa polkiniń polıtseıleri Talǵat Namazbaev pen Ábilqaıyr Myrzataev patrýldeý kezinde Qutpanov kóshesindegi úıdiń kireberisiniń janynan bir er adamdy baıqaıdy.
Polıtsııa qyzmetkerleri toqtap, ony tekserý úshin qasyna jaqyndaǵan. Er adamnyń ózimen birge qujattary bolmaǵan. Keıin ol Saryarqa aýdany Polıtsııa basqarmasyna jetkizildi.
Onyń aıtýynsha, 4 jyl Aqmola oblysynda turyp, jumys istegen jáne osy ýaqyt ishinde týystarymen baılanysyn úzgen. Tekserý kezinde 48 jastaǵy er adamnyń Aqsý qalasynda turatyn 29 jastaǵy uly bar ekeni anyqtaldy.
Polıtseıler oǵan beıne qońyraý arqyly habarlasyp, balasy ákesin birden tanyǵan.
Uly men ákesiniń birneshe jyldan keıin sóılesken áserli sáti beınege túsip qalǵan. Balasy ákesin taýyp, jańa jylda otbasyna tynyshtyq pen qýanysh syılaǵan elordalyq polıtsııa qyzmetkerlerine alǵysyn bildirdi.
Sol kúni uly kelip ákesin alyp ketti.
Foto: polisia.kz
