4 jolaqty jol: Esik qalasynda artyq syzylǵan jol belgileri alyndy

QONAEV. KAZINFORM – Almaty oblysy Esik qalasynyń kireberisindegi jolda 2 jolaqtyń ornyna 4 jolaq salynǵan. 

Mundaı «jańashyldyqtyń» sýreti áleýmettik jelide tarady. Eńbekshiqazaq aýdanynyń ákimdigi bul derek boıynsha túsinikteme berdi. 

Aýdan ákimdiginiń jaýabyna sáıkes, oblystyq mańyzy bar «Esik – Saımasaı» avtojolynyń 7-shaqyrymy tusynda kúrdeli jóndeýden keıin ishki qozǵalys jolaǵyn keńeıtý qajettiligi anyqtalǵan. 

– Bul shara avtobýstyń mektepke burylý kezinde qaýipsiz manevr jasaýyn qamtamasyz etý úshin qajet boldy. Osyǵan baılanysty merdiger qosymsha eki syzyq syzǵan, nátıjesinde atalǵan ýchaskedegi jol tańbalary tórt jolaqty bolyp kóringen. Jobaǵa sáıkestendirý maqsatynda merdiger uıym – «DSÝ-13» AQ buryn syzylǵan eki syzyqty alyp tastady, - delingen jaýapta.

Aýdan ákimdigi jol tańbasyn qaıta qalpyna keltirý jáne túzetý jumystary merdigerdiń óz qarajaty esebinen júzege asyrylǵanyn atap ótti.

Eske salaıyq, buǵan deıin Almaty oblysynyń Esik kólinde demalýshylardan 2 ret zańsyz tólem alynǵanyn jazǵanbyz.