4 jylda turmystyq zorlyq-zombylyqtan 869 adam kóz jumdy – Aıda Balaeva

El óńirlerinde otbasylarǵa jan-jaqty kómek kórsetý úshin 68 otbasylyq qoldaý ortalyǵy jumys isteıdi. Kelesi jyly barlyǵyna biryńǵaı jumys tásilderi engiziledi. Bul týraly Mádenıet jáne aqparat mınıstri Aıda Balaeva Úkimet otyrysynda aıtty, dep habarlaıdy Kazinform. 

«Ókinishke qaraı, búgingi statıstıka kóńil kónshitpeıdi. Sońǵy 4,5 jylda úıdegi zorlyq-zombylyqtan 869 adam kóz jumdy. Densaýlyqqa aýyr zııan keltirýdiń 2086 faktisi tirkelgen. Sondyqtan aldyn alý sharalaryn keshendi túrde júrgizý bizdiń jiti nazarymyzda», - dedi mınıstr.

Onyń aıtýynsha, otbasylarǵa jan-jaqty kómek kórsetý úshin óńirlerde 68 otbasylyq qoldaý ortalyǵy jumys isteıdi. Onyń 19-y ýaqytsha baspanamen qamtamasyz etedi. Bul tájirıbe 2019 jyldan beri bar.

«Járdemge muqtaj azamattarǵa «bir tereze» qaǵıdaty boıynsha kómek kórsetilip jatyr. Ortalyqtar psıhologııalyq, áleýmettik jáne quqyqtyq kómek kórsetýmen qatar, otbasy ınstıtýtyn nyǵaıtýǵa jan-jaqty qoldaý jasaıdy. Tek osy jyldyń basynan bastap 100 myńnan astam keńes berildi. Degenmen qazirgi ýaqytta ortalyqtar qyzmeti birkelki emes ekenin moıyndaımyz. Osyǵan baılanysty mınıstrlik ortalyqtardyń qyzmetin standarttaý úshin biryńǵaı Tujyrymdama jobasyn ázirlep jatyr», - dedi A.Balaeva.

Onyń taǵy bir mańyzdy baǵyty – vedomstvoaralyq baılanys arqyly áleýmettik jaǵdaıy tómen otbasylardyń jaǵdaıyna yqpal etý. Kelesi jyldan bastap, Otbasyn qoldaý ortalyqtarynyń barlyǵyna biryńǵaı jumys tásilderi engiziledi.