4 jyl ishinde Ózbekstanda «Taza aýa» jalpyulttyq jobasy iske asyrylady
TAShKENT. KAZINFORM – Ózbekstanda 2026-2030 jyldar aralyǵynda «Taza aýa» jalpyulttyq jobasy iske asady. Tıisti jarlyqqa el prezıdenti Shavkat Mırzıeev qol qoıdy, dep habarlaıdy Kazinform agenttiginiń Tashkenttegi menshikti tilshisi.
Qujatqa sáıkes, aýany lastaıtyn zııandy shyǵaryndylardyń kólemin 10,5%-ǵa qysqartý kózdelgen. Sonymen birge qorshaǵan ortaǵa áser etý deńgeıi І jáne ІІ sanatqa enetin kásiporyndar súzgi qondyrǵylaryn ornatýy tıis.
Jarlyqqa saı, kólikterden aýaǵa bólinetin zııandy zattardyń mólsherin 10%-ǵa azaıtý josparlanyp otyr. «Taza aýa» kezeń-kezeńmen iske asady. Áýeli atalǵan tájirıbeni Ferǵana óńirine, keıin respýblıkanyń ózge de oblystaryna engizý qarastyrylǵan.
Buǵan deıin habarlaǵanymyzdaı, bıyl sáýirde elordada ótetin Óńirlik ekologııalyq sammıtinde Ortalyq Azııa elderiniń basshylary Astana deklaratsııasyna qol qoıady.
Qosa ketsek, aldaǵy ýaqytta Ózbekstan jasandy jolmen jańbyr jaýdyrý tehnologııasyn engizýdi kózdep otyr.
Munymen birge Ózbekstan 2028 jylǵa deıin alqaptardyń 80%-yna sý únemdeý tehnologııalaryn engizbek.
Taıaýda Kazinform agenttigine Sý resýrstary jáne ırrıgatsııa mınıstri Nurjan Nurjigitov málim etkendeı, qazirgi ýaqytta Qazaqstan men Ózbekstan Syrdarııa ózenine sýdy esepke alatyn qurylǵylardy ornatyp jatyr.
