4 jyl 6 aıǵa sottalǵan Armenııanyń burynǵy Mádenıet mınıstri jazadan sytylyp ketti
ASTANA. KAZINFORM — Armenııanyń burynǵy mádenıet mınıstri Asmık Pogosıan 4 jyl 6 aı merzimge bas bostandyǵynan aıyryldy, alaıda oǵan raqymshylyq qoldanyldy. Sot úkimi zańdy kúshine endi. Bul týraly Armenpress agenttigi Armenııanyń Bas prokýratýrasyna silteme jasap habarlady.
Armenııa Bas prokýratýrasynyń málimetinshe, 2023 jylǵy 18 qazanda Asmık Pogosıannyń 2012-2016 jyldary Armenııa Respýblıkasynyń mádenıet mınıstri qyzmetin atqara otyryp, qyzmettik ókilettikterin memleket múddesine qarsy paıdalanǵany anyqtalǵan. Ol qylmystyq topqa Erevan qalasyndaǵy P.Chaıkovskıı atyndaǵy orta mýzykalyq mektepke tegin paıdalanýǵa berilgen jer teliminen bólingen 300 sharshy metr jerdi zańsyz ıemdenýge járdemdesken.
2023 jylǵy 27 qyrkúıekte prokýror Asmık Pogosıanǵa qatysty jarııa qylmystyq qýdalaý isin qozǵady. Al 2023 jylǵy 4 qazanda burynǵy mádenıet mınıstrine qatysty is bólinip, Sybaılas jemqorlyqqa qarsy sotqa joldandy.
Sybaılas jemqorlyqqa qarsy qylmystyq sottyń 2025 jylǵy 6 qarashadaǵy sheshimimen Asmık Pogosıan qyzmettik ókilettigin asyra paıdalaný, asa iri kólemdegi alaıaqtyqqa kómektesý jáne oǵan aıdap salý baptary boıynsha kináli dep tanylyp, 4 jyl 6 aıǵa bas bostandyǵynan aıyryldy.
Sot úkimi búgin, 31 qańtarda zańdy kúshine endi. Alaıda sottyń sheshimimen aıyptalýshy Asmık Pogosıan jazadan bosatyldy. Oǵan 2018 jylǵy 6 qarashada kúshine engen Armenııa Respýblıkasynyń «Erebýnı–Erevan qalasynyń negizi qalanǵanyna 2800 jyl tolýyna jáne Armenııa Birinshi Respýblıkasynyń táýelsizdigi jarııalanǵanyna 100 jyl tolýyna oraı qylmystyq ister boıynsha raqynshylyq jarııalaý týraly» zańynyń 2-baby 1-bóliginiń 2-tarmaǵy qoldanyldy.
Eske sala keteıik, 2024 jyly aqpanda elimizdiń burynǵy Mádenıet jáne sport mınıstri Arystanbek Muhamedıuly 11 jylǵa bas bostandyǵynan aıyryldy.