4 jeltoqsanda el boıynsha qaı joldarda shekteý bar
ALMATY. KAZINFORM — «QazAvtoJol» ulttyq kompanııasy eldegi joldardyń qazirgi ahýaly týraly habarlady.
Kompanııanyń málimetinshe, Aqmola oblysynda 2025 jylǵy 3 jeltoqsan kúni keshki ýaqytta aýa raıynyń nasharlaýyna baılanysty (temperatýranyń tómendeýi, kóktaıǵaq, borandy qar) respýblıkalyq mańyzy bar birneshe jolda jyldamdyq rejımine ózgeris engizildi:
• KAZ 01 «Astana — Qaraǵandy — Almaty» avtojolynyń 30-92-shaqyrym (Jibek Joly aýyly — Anar stantsııasy) ýchaskesinde barlyq kólik túri úshin jyldamdyq rejımi 110 shaq/saǵ-tan 80 shaq/saǵ-qa deıin tómendetildi.
• KAZ 02 «Astana — Kókshetaý (qala mańy aınalyp ótýimen) — Petropavl — RF shekarasy (Jańa Jol beketi)» avtojolynyń 19-144-shaqyrym (Astana q. — Alakól a.) ýchaskesinde barlyq kólik túri úshin jyldamdyq rejımi 110 shaq/saǵ-tan 80 shaq/saǵ-qa deıin tómendetildi.
• «KAZ02 Astana — Kókshetaý (aınalma jolymen) — Petropavl — RF shekarasy (Jańa Jol ótkizý pýnkti)» avtojolynyń 144-231-shaqyrymynda (Alakól aýyly — Şýchınsk q.) barlyq kólik túrleri úshin jyldamdyq rejımi 80 shaq/saǵ-tan 110 shaq/saǵ-qa deıin ózgertiledi.
Qaraǵandy oblysynda 2025 jylǵy 4 jeltoqsanda saǵat 09:00–den bastap:
«KAZ01 Astana — Qaraǵandy — Almaty» respýblıkalyq mańyzy bar avtomobıl jolynyń ýchaskesinde 92-164-shaqyrym arasynda (Anar stantsııasynan Temirtaý qalasyna deıin) kóliktiń barlyq túri úshin jyldamdyq 140 shaq/saǵ-tan 110 shaq/saǵ-qa deıin tómendetildi.
Sondaı-aq úsh óńirde buǵan deıin engizilgen shekteýler áli de kúshinde.
Pavlodar oblysy
«Astana — Shiderti — Pavlodar — Ýspenka — RF shekarasy» avtojolynda (Qalqaman eldi mekenine kireberis pen Astanaǵa shyǵatyn baǵyt) kóliktiń barlyq túri úshin qozǵalys shekteldi.
Soltústik Qazaqstan oblysy
«Tımırıazevo — Sarykól — oblys shekarasy» avtojolynyń 0-30-shaqyrymynda (Qostanaı oblysy shekarasy — Tımırıazevo aýyly) kóliktiń barlyq túri úshin shekteý bar.
Shyǵys Qazaqstan oblysy
Tirkemesi bar jáne jartylaı tirkemeli júk kólikteriniń qozǵalysy Osınov asýynda ýaqytsha shekteldi. Shekteý «Óskemen — Altaı –Katonqaraǵaı — Rahman qaınary» avtojolynyń 46-66-shaqyrymyndaǵy (Severnoe aýyly — Serebrıansk qalasy) ýchaskesinde saqtalady.
Aýa raıy
2025 jylǵy 4 jeltoqsanda Aqmola, Soltústik Qazaqstan, Shyǵys Qazaqstan, Qyzylorda, Qaraǵandy, Abaı, Jetisý, Túrkistan, Jambyl jáne Pavlodar oblystarynyń keı jerinde qar aralas jańbyr men qar jaýady.
— Sol sebepti júrgizýshilerge jyldamdyq rejımi men qaýipsiz araqashyqtyqty qatań saqtap, joldardaǵy aýa raıynyń qolaısyzdyǵyn eskerýlerińizdi suraımyz, — delingen «QazAvtoJol» habarlamasynda.
Eske salaıyq, buǵan deıin sınoptıkter 4 jeltoqsanda Astana men 14 óńirde aýa raıy buzylatynyn eskertken edi.