4 jastaǵy Tamerlan Italııanyń sán álemin baǵyndyrady
AQTÓBE. QazAqparat - Aqtóbe qalasynyń kishkentaı turǵyny Tamerlan Sansyzbaı sángerlikti Mılannan bastady. Kamera men fotoapparat aldynda jumys istegendi unatatyn bala qyrkúıekte taǵy bir iri sán kórsetilimine qatysady. Daýn sındromyna shaldyqqan balanyń anasy Aıgerim Bıjanova jetistikke jetýdiń jolymen bólisti, dep habarlaıdy QazAqparat tilshisi.
Búgin Tamerlan Sansyzbaı 4 jasqa toldy. Ol Mılandaǵy sán kórsetilimine joldama alyp, Italııaǵa baryp kelgen jalǵyz qazaq balasy. Bir-aq kúnde eldi ózine qaratyp, tamsandyrǵan balanyń syry nede? Tamerlannyń ata-anasy Artýr men Aıgerim Bıjanovtar ulynyń sángerlik jolyn qalaı ashty? Qazir kóptiń kókeıinde osy suraq bar.
«Mılanǵa barý úshin aldymen Astanaǵa jetip, keıin Rımge ushtyq. Sol jerden poıyzben Mılanǵa jettik. Mılanda biz fotosessııaǵa qatysqan edik. Ári qaraı Eýropany tamashalaýdy jón kórdik. Shyǵyndy bizdi shaqyrǵan kompanııa ótedi.
Shaqyrýǵa qalaı qol jetkizdińiz?
- Bárin osy suraq qyzyqtyrady. Qazaqstandyq dızaıner Dana Nábı óz paraqshasynda Tamerlannyń fotosyn jarııalady. Sol jerde ulymdy «DANA NABI COUTURE» jeńimpazy dep tanydy. Ol Dana Nabıdiń balalarǵa arnalǵan toptama kelbetine aınaldy. Jyl basynda Aıda Kaýmenova, Leks Chjen, Táýelik Múslimniń qatysýymen ótken sán kórsetilimine shaqyrý aldy. Áleýmettik paraqshadaǵy fotony Italııanyń Mılan qalasynda turatyn sán áleminiń ókili Mıla Anýfrıeva kórip, Tamerlannyń súıkimdiligin baıqaǵan. Bizdiń baılanys telefondarymyzdy surap alyp, keıin Dana Nábı arqyly balanyń Daýn sındromymen týǵanyn bildi. Sol kezde ıtalıalyq sán áleminiń keńesshisi, synshysy tańǵalǵan. Sebebi, jaratylysy erekshe balalar kóbine el aldyna shyqpaıdy. Olardyń ata-analary úılerinde otyrady, qoǵamnan tysqary júredi. Men ondaı ana emespin. Balamnyń úlken jetistikterge jetýi úshin bar kúsh-jigerimdi jumsap, ýaqytymdy arnaımyn. Tamerlan sán álemin baǵyndyrǵan birinshi qazaq balasy bolsa eken deımin, - dedi Aıgerim Bıjanova.
Aldymen Qazaqstandaǵy, keıin Mılandaǵy sán kórsetilimine shaqyrý alǵan Tamerlanǵa elimizdiń blogerleri men ánshi Zarına Omarova únemi kómektesip otyrǵan. 
Tamerlan der kezinde júrip, óz erkimen tamaq ishti. Ata-anasy, týǵan-týystary da balada Daýn sındromy bar ekenin bilgenimen, qarapaıym sábılerden ereksheligi múlde baıqalmaǵan. Alǵashynda ata-anasy ýaıymǵa salynyp, kúızeliske túskenimen, keıin bul qıyndyqtyń bárin jeńip, Tamerlannyń bolashaǵyna yńǵaıly mamandyqty tańdaı bastaǵan. Ǵylymdy emes, óz qarym-qabiletine saı keletin salany ıgerse eken degen ana tilegi oryndalyp keledi. Aıgerim Bıjanova erkelep, áýenge bıleı jóneletin balasyna fotosessııa uıymdastyrdy.
«Kıim dúkenine baryp, ıesinen fotosessııaǵa qajetti kıimdi ýaqytsha bere turýyn suradym. Sol kezde dúken ıesi «mindetti túrde bir kıim satyp alasyz» dep talap qoıdy. Ekijaqty kelisim oryndaldy. Qolymyzǵa kásibı fotolar tústi. Endigi jumys - áleýmettik jelige balanyń fotosyn salyp, elge tanytý, kórsetý, sánger ekenin halyqqa uǵyndyrý. Biraq eshkim oǵan kelisim bermedi. Al kelisim bergenderi balanyń Daýn sındromy bar ekenin aıshyqtap kórsetýdi qalady. Bul usynystary maǵan unaǵan joq. Sóıtip kóp kelisimnen bas tarttym», - Aıgerim Bıjanova.
Tamerlan Sansyzbaı Mılanǵa aqpan aıynda barýy tıis edi. Biraq balabaqshaǵa baryp júrgen bala aýyryp, em qabyldaǵan. Sóıtip sapar keıinge shegerilip, aýqymdy sán kórsetiliminen qalyp qoıdy. Baǵdarlama boıynsha sán kórsetilimi kishkentaı aqtóbelikke arnalyp, ol ataqty sángerlermen birge podıýmǵa shyǵýy tıis edi. Biraq sáti kelmedi. Al sáýir aıyndaǵy Mılanǵa sapary kezinde kishkentaı Tamerlan balalar kıiminiń jarnamasyna tústi. «Qyrkúıekte taǵy da Mılanǵa baramyz. Ol kezde iri sán kórsetilimi bolady. Josparymyz kóp. Biz Tamerlanmen birge qaıyrymdylyq qoryn ashyp, balalarǵa kómektesýdi oılap júrmiz. Ideıa kóp, ony iske asyrýdy ýaqyt enshisine qaldyrdyq», - dedi Aıgerim Bıjanova.
Tamerlannyń ákesi Artýr Bıjanov vahtalyq ádispen jumys isteıdi. Ol jumystan oralǵan soń bar ýaqytyn balasyna arnap, únemi janynan tabylady. Tamerlan da ákesine jaqyn. Al Aıgerim Bıjanova balasy úshin arnaıy balalardy damytý ortalyǵyn ashty. Jeke balabaqshalardyń qyzmeti unamady, al memlekettik balabaqshalar ony tek arnaıy topqa qabyldady. Ekeýi de balanyń damýyna kepil bermedi. Sondyqtan kishkentaı Tamerlannyń anasy balasyna arnap ortalyq ashty.
«Daýn sındromymen aýyrady dep balany bólek tárbıeleý bul - qate jol. Qarapaıym búldirshinder damýy tejelgen balalarmen birge ósse, olar qoǵamda mundaı jaǵdaıdyń, adamdardyń kezdesetinin kishkentaıynan biler edi. Meniń balam bılegendi unatady. Adamdarmen aralasyp, tez oınap ketedi. Tek olardy qoldap, kómek berý kerek. Sol kezde qataryna qalmaı ósedi, jetiledi», - dedi A.Bıjanova.
