4 jasar túrkistandyq výnderkınd kóbeıtý men bólýdi erkin meńgergen
ASTANA. KAZINFORM — Túrkistan oblysynda 4 jasar výnderkınd bala mektep qabyrǵasynda bilim alyp júr. Álı Adambek esimdi búldirshin qatarlastary balabaqshada júrgende, kúrdeli esepterdi op-ońaı shyǵarady.
Úshtańbaly sandardy erkin qosyp-azaıtyp júrgen Álı men onyń anasy Jibek Joly arnasynyń «Búgin LIVE» baǵdarlamasyna onlaın suhbat berdi.
— Ózi tili shyqqannan bastap oqý quraldaryna qyzyǵyp, saýsaqpen sanaı bastady. Keıin balabaqshada júrgende de apaılary qabiletin baıqaǵan. Kóbeıtý-bólý syndy esepterdi shyǵaryp jatqanyn kórip, «mektepke aparyp kóresiz be? Bizde balaǵa qyzyq bolmaı jatyr» dep aıtty. Basynda kishkene baryp kórsinshi dep aparǵanbyz. Eger qınalsa, barmaı-aq qoıady degen sheshim shyǵardyq. Biraq qyzyǵýshylyǵy áli de jaqsy. Tańerteń qınalmaı turyp, maǵan erip mektepke barady, — deıdi Álıdiń anasy Nurgúl Myrzaǵalı.
4 jasar búldirshin aǵylshynsha da úırenip júr eken.
— Men ózim aǵylshyn tili pániniń muǵalimimin. Ulym Álı de aǵylshyn tilinde sanaýdy, esepteýdi meńgergen. Janýarlardyń da attaryn biledi. Balam áli resmı túrde mektepke tirkelgen joq. Biraq daıarlyq synyp muǵalimderi qabiletin kórgennen keıin daıarlyq synypqa barýǵa bolady dep sheshti. Qazir solaı baryp júr. Arnaıy tekseris boıynsha qarym-qabileti mektepke barýǵa tolyq jetip tur. Meniń 6 balam bar. Álı — eń kishi ulym. Balalarymnyń báriniń mekteptegi úlgerimderi jaqsy. Ózge balalarymnyń tilge qabileti jaqsy edi. Al matematıkalyq qabilet tek Álıde ǵana, — deıdi Álıdiń anasy.
Výnderkıng bala otandyq bilim berý salasyndaǵy bedeldi kásipkerlerdiń de kózine túsip úlgeripti.
— Úıde oınaıdy, teledıdar kóredi, sabaqqa baryp keledi. Sosyn ózi artymnan qalmaı, «Esep shyǵaraıyqshy», «Mynaý qandaı bolady?», «Mynaý qansha bolady?» dep suraqty óte kóp qoıady. Balany qınap, arnaıy daıyndap, oqytpaımyz. Ótken joly Yrysbek Máýit aǵaı aýylǵa arnaıy izdep kelip, óziniń mektebine grant usynyp ketti. Endi 3-synypqa ótkende sol mektepke aparýdy josparlap otyrmyz, — deıdi Nurgúl Myrzaǵalı.
Aıta keteıik, Astanada 3 myń búldirshin «Balaqaılar mektebimen» qamtylatyny belgili boldy.