4 jarym myńnan astam prokýror kezekten tys attestattaýdan ótedi

Bul týraly QR Bas prokýratýrasynyń baspasóz qyzmetinen habarlandy.

«Mundaı aýqymdy shara elimizde tuńǵysh ret ótkizilýde. Ondaǵy basty maqsat - qoǵamnyń qoldaýyna jaýap beretin, óziniń tańdaǵan isine adal jáne kásibı qyzmetkerlerdi irikteý, quqyq qorǵaý organdary qataryn bedel túsiretin qyzmetkerlerden tazartý, quqyq qorǵaý organdaryna degen halyqtyń senimin arttyrý bolyp tabylady. Attestattaýdy  ótkizýdiń ózektiligi, bárinen buryn quqyq qorǵaý organdarynyń qyzmetkerleriniń kásibı daıarlyq deńgeıin anyqtaý, joǵary bilikti kadrlardy qalyptastyrý qajettigine baılanysty týyndap otyr», - deıdi  Bas prokýratýra  Kadr jumysy departamenti bastyǵynyń mindetin atqarýshy Roza Dosymbekova.

Onyń aıtýynsha, kezekten tys attestattaýdan barlyǵy 4 jarym myńnan astam prokýror ótetin bolady. Attestattaý birqatar satyly kezeńnen turady, Atap aıtqanda, olar - attestattaýdy ótkizýge daıarlyq, zańnamany bilýge jáne logıkalyq oılaý qabiletine kompıýterlik testileý, psıhologpen áńgimelesýden ótý, tıisti attestattaý komıssııalary ótkizetin áńgimelesý, attestattaý komıssııalarynyń sheshim shyǵarýy.

Attestattaý barysynda qyzmetkerlerdiń jeke qasıetterine erekshe mán beriledi. Naqty aıtqanda til tabysa bilý, azamattarmen jumys isteý qabileti, psıhologııalyq ornyqtylyǵy eskeriledi. Qyzmetkerdiń sybaılas jemqorlyqqa qarsy zańnamany saqtaýy, Memlekettik qyzmetshilerdiń Ar-namys kodeksiniń talaptaryn oryndaýy nazarǵa alynady.

«Bul sharanyń mańyzdylyǵyn ataı otyryp, quqyq qorǵaý qyzmetin odan ári jetildirý úshin, prokýratýra organdary Memleket basshysynyń tapsyrmalaryn der kezinde jáne sapaly oryndalýyn qamtamasyz etedi, al bizdiń qyzmetkerlerimiz ózderiniń biliktiligin jáne kásibı daıarlyǵyn dáleldeıdi dep senim bildiremin», - deıdi R. Dosymbekova.