4 jáne 5 balasy bar otbasylar járdemaqydan qaǵylmaıdy - mınıstrlik
ASTANA. KAZINFORM — Qazaqstanda 4 jáne 5 balaly otbasylar kópbalaly otbasylarǵa arnalǵan memlekettik járdemaqydan aıyrylýy múmkin degen aqparat shyndyqqa janaspaıdy. Bul týraly Eńbek jáne halyqty áleýmettik qorǵaý mınıstrligi habarlaıdy.
Mınıstrliktiń túsindirýinshe, birqatar buqaralyq aqparat quraldarynda, messendjer toptarynda jáne áleýmettik jelilerde 6 jáne odan da kóp balasy bar otbasylar ǵana kópbalaly otbasy mártebesine ıe bolady degen jalǵan málimetter taralýda.
Qoldanystaǵy zańnamaǵa sáıkes, 4 jáne odan da kóp kámeletke tolmaǵan balasy nemese 23 jasqa deıingi kúndizgi bólimde oqıtyn stýdent balasy bar otbasylar kópbalaly otbasy retinde tanylady. Mundaı otbasylarǵa tabysyna qaramastan aı saıynǵy járdemaqy tólenedi.
2025 jyly kópbalaly otbasylarǵa beriletin járdemaqynyń mólsheri balanyń sanyna qaraı saralanyp esepteledi:
-
4 balaǵa — 16,03 AEK nemese 63 030 teńge;
-
5 balaǵa — 20,04 AEK nemese 78 798 teńge;
-
6 balaǵa — 24,05 AEK nemese 94 565 teńge;
-
7 balaǵa — 28,06 AEK nemese 110 332 teńge;
-
8 jáne odan da kóp balaǵa — ár bala úshin 4 AEK nemese 15 728 teńge tólenedi.
Sonymen qatar, 6 jáne odan da kóp bala týyp, tárbıelegen analarǵa beriletin marapattarǵa baılanysty qosymsha járdemaqy qarastyrylǵan:
-
«Kúmis alqa» ıegerlerine — 6,40 AEK nemese 25 165 teńge;
-
«Altyn alqa», «Batyr ana», I jáne II dárejeli «Ana dańqy» ordenderimen marapattalǵandarǵa — 7,40 AEK nemese 29 097 teńge aı saıyn tólenedi.
Mınıstrlik azamattardy tek resmı aqparat kózderine senýge shaqyrady jáne jalǵan aqparat taratýdyń zań aldynda jaýapkershilikke tartylatynyn eskertedi.
Aıta keteıik, bıyl kópbalaly otbasylar men nagradtalǵan analar 253 mlrd teńgeden astam járdemaqy aldy.