4 jańa esim – Bektenovtiń kabıneti qalaı jasaqtaldy
ASTANA. KAZINFORM – Búgin Premer-Mınıstr laýazymyna kirisken Oljas Bektenovtiń ornyna Aıbek Dádebaev Prezıdent Ákimshiliginiń basshysy bolyp taǵaıyndaldy. Keshke qaraı O. Bektenov basqaratyn mınıstrler kabınetiniń quramy da belgili boldy. Kazinform jańa Úkimettiń quramyna sholý jasap kórdi. Áńgimeni tórt jańa esimnen bastaıyq.
«Báıterekten» Ulttyq ekonomıkaǵa
48 jastaǵy Nurlan Baıbazarov Ulttyq ekonomıka mınıstri bolǵan Álibek Qýantyrovtyń ornyna jaıǵasty. Búginge deıin «Báıterek» ulttyq basqarýshy holdıngin basqarǵan ol qyzmettegi 23 jylynyń kóbin kvazımemlekettik sektorda ótkergen. «Qazaqstannyń Damý Banki», «Qazaqstan temir joly», «QazMunaıGaz», «Ónerkásipti damytý qory» kompanııalarynda jumys istegen Nurlan Baıbazarov eks-mınıstr Á.Qýantyrovtyń qosylǵan qun salyǵyn tóleıtin tulǵalardyń qataryn keńeıtý arqyly bıýdjet tapshylyǵyn joıý týraly bastamasyn ne isteıtini qyzyq.
Májilis komıtetinen Qarjy mınıstrligine
Nurlan Baıbazarov mınıstrlik laýazymymen qatar Premer-mınıstrdiń orynbasary qyzmetin qatar alyp júredi. Bul mindet oǵan Qarjy mınıstri bolǵan Erulan Jamaýbaevtan qaldy dep topshylaýǵa bolady. Olaı deıtinimiz, onyń ornyna kelgen Mádı Tákıev tek mınıstrlik laýazymyn atqarady.
Eńbek jolyn esepshilikten bastaǵan Mádı Tókeshuly 1 sáýirde 46-ǵa tolady. Salyq organdarynda túrli laýazymdar atqarǵan ol 2019-2020 jyldary QR Ulttyq ekonomıka vıtse-mınıstri bolsa, 2020-2023 jyldary Prezıdent Ákimshiliginiń Áleýmettik-ekonomıkalyq monıtorıng bóliminiń meńgerýshisi retinde jumys istedi. 2023 jylǵy naýryzdan bastap Májilistiń Qarjy jáne bıýdjet komıtetiniń tóraǵasy bolyp jumys istep keldi.
Prezıdent kúzetinen TJM-ge
Syrym Sháriphanovtyń ornyna kelgen Tótenshe jaǵdaılar mınıstri Shyńǵys Árinov 2006 jyldan 2022 jylǵa deıin Memlekettik kúzet qyzmetinde túrli satydan ótip, shyńdalǵan. 40 jastaǵy jańa mınıstr 2022 jyldyń qańtarynan búginge deıin Qazaqstan Respýblıkasy Prezıdentiniń Ókimimen Qazaqstan Respýblıkasy Memlekettik kúzet qyzmeti bastyǵynyń orynbasary — Prezıdent kúzet qyzmetiniń bastyǵy bolyp keldi.
Depýtattyqtan Densaýmınge
Á. Smalıylov kabınetindegi úsh áıel mınıstrdiń biri bolǵan Ajar Ǵınııat qyzmetimen qoshtasqanymen, ornyn taǵy burymdy basty. Ol – Senat depýtaty Aqmaral Álnazarova.
52 jastaǵy A. Álnazarova – medıtsına ǵylymdarynyń doktory. Pedıatr maman Qyzylorda oblysynyń densaýlyq saqtaý salasynda basshylyq qyzmetter atqaryp, jergilikti máslıhat depýtaty boldy. Senattaǵy depýtattyq mandatynda da densaýlyq salasynyń ózekti problemalaryn kóterýmen este qaldy.
Taǵy bir múmkindik berilgender
Memleket basshysynyń Jarlyqtarymen kelesi laýazym ıeleri burynǵy oryndarynda qaldy:
- 37 jastaǵy Kólik mınıstri Marat Qarabaev,
- 54 jastaǵy Týrızm jáne sport mınıstri Ermek Marjyqpaev,
- 49 jastaǵy Mádenıet jáne aqparat mınıstri Aıda Balaeva,
- 56 jastaǵy Sý resýrstary jáne ırrıgatsııa mınıstri Nurjan Nurjigitov,
- 42 jastaǵy Ǵylym jáne joǵary bilim mınıstri Saıasat Nurbek,
- 62 jastaǵy Ekologııa jáne tabıǵı resýrstar mınıstri Erlan Nysanbaev,
- 54 jastaǵy Oqý-aǵartý mınıstri Ǵanı Beısembaev,
- 40 jastaǵy Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın,
- 57 jastaǵy Aýyl sharýashylyǵy mınıstri Aıdarbek Saparov,
- 53 jastaǵy Energetıka mınıstri Almasadam Sátqalıev,
- 46 jastaǵy Saýda jáne ıntegratsııa mınıstri Arman Shaqqalıev,
- 42 jastaǵy Ónerkásip jáne qurylys mınıstri Qanat Sharlapaev,
- 55 jastaǵy Eńbek jáne halyqty áleýmettik qorǵaý mınıstri,Svetlana Jaqypova,
- 44 jastaǵy Ádilet mınıstri Azamat Esqaraev.
21 mınıstrdiń úsheýi - áıel
Sondaı-aq Konstıtýtsııa boıynsha Prezıdent óz betimen taǵaıyndaıtyn úsh mınıstr de oryndaryn saqtap qaldy. Atap aıtsaq:
- Murat Nurtileý Qazaqstan Respýblıkasy Premer-Mınıstriniń orynbasary – Syrtqy ister mınıstri laýazymyna,
- Erjan Sádenov Qazaqstan Respýblıkasynyń Іshki ister mınıstri laýazymyna,
- Rýslan Jaqsylyqov Qorǵanys mınıstri laýazymyna qaıta taǵaıyndaldy.
Burynǵy Qarjy mınıstri Erulan Jamaýbaevtan basqa vıtse-premerler de qyzmetinde qaldy.
Jańa kabınettiń jasyna kelsek, eń jas mınıstr Kólik mınıstri Marat Qarabaev bolyp tur. Al eń egde jastaǵy Ekologııa jáne tabıǵı resýrstar mınıstri Erlan Nysanbaevtyń zeınet jasyna jetýine bir jyldaı ǵana ýaqyt qalǵan.
Jalpy mınıstrler kabıentindegi 21 mınıstrdiń úsheýi - áıel.
Aıta keteıik, keshe Memleket basshysy «Qazaqstan Respýblıkasynyń Úkimeti týraly» jarlyqqa qol qoıdy.
Prezıdent keńesshisi - baspasóz hatshysy Berik Ýálı Úkimet basshysyn taǵaıyndaý rásimi jóninde pikir bildirdi.
Memleket basshysyna «Amanat» partııasynyń atynan Premer-Mınıstrdiń kandıdatýrasy usynyldy.
Prezıdent Parlamenttegi partııa fraktsııalarynyń jetekshilerimen kezdesti.
Májilis depýtattary Premer-Mınıstr laýazymyna Oljas Abaıuly Bektenovti taǵaıyndaýǵa kelisim berdi.
