4-shi sessııa barysynda Májilis 144 zań jobasyn maquldady - palata spıkeri O. Muhamedjanov
ASTANA. 29 maýsym. QazAqparat /Qanat Mámetqazyuly/ - 4-sessııa barysynda Májilis 144 zań jobasyn maquldap, Senatqa jiberdi. 104 zańǵa Elbasy qol qoıdy. Búgin QR Parlamenti Májilisiniń tórtinshi sessııasyndaǵy sońǵy otyrysynda ótken kezeńdi qorytyndylap sóz sóılegen palata Tóraǵasy Oral Muhamedjanov osylaı málim etti.
Palata spıkeriniń aıtýynsha, 4 sessııa Májilis depýtattary úshin mańyzdy ári jaýapkershiligi zor sessııa boldy.
«Zań shyǵarý protsesinde ekonomıkalyq reformalardy quqyqtyq qamtamasyz etýge basa kóńil bólindi. Osy maqsatta biz salyq salý júıesin jetildirý, memlekettik múlikti tıimdi basqarýǵa, kólik qyzmetiniń sapasyn arttyrýǵa, agrarlyq sektordy odan ári damytýǵa baǵyttalǵan zańdardy qabyldadyq. Shaǵyn jáne orta kásipkerlikke qoldaý kórsetý boıynsha da aýqymdy jumys atqardyq. Sonymen qatar, depýtattyq qyzmettiń basym baǵyttarynyń biri halyqqa áleýmettik qoldaý kórsetýdi kúsheıtý, bilim berý men densaýlyq saqtaýdy damytýǵa qajetti jaǵdaılar jasaý bolyp tabylady», - dedi spıker. Onyń aıtýynsha, ótken sessııa barysynda zeınetaqymen qamsyzdandyrýdy arttyrýǵa, áleýmettik mańyzy bar azyq-túlik taýarlarynyń baǵalaryn retteýge, ǵylym men ınnovatsııalarǵa qoldaý kórsetýge baǵyttalǵan mańyzdy zańdar qabyldanǵan.
«Depýtattardyń halyqaralyq saladaǵy zań shyǵarý jumysy da aýqymdy boldy. Sessııa barysynda birtalaı halyqaralyq sharttardy, konfentsııalar men kelisimderdi ratıfıkatsııaladyq. Onyń ishinde Keden odaǵy men Biryńǵaı ekonomıkalyq keńistiktiń jumysyn retteıtin qujattar da bar», - dedi O. Muhamedjanov.
