4 saǵatqa deıingi kezek: Jańa bıometrııalyq júıe Eýroodaq áýejaılarynyń jumysyn tejedi
ASTANA. KAZINFORM — Alty eýropalyq eldiń áýejaılarynda EES bıometrııalyq sáıkestendirý júıesi birneshe saǵatqa sozylǵan kezek týdyrdy. Áýe kompanııalardyń basshylary dabyl qaǵyp, jazdyń sońyna deıin júıeniń jumysyn toqtatýdy talap etti, dep habarlaıdy DW.
Eýropalyq Odaqtyń kirý/shyǵý júıesiniń (EES) tolyq iske qosylýy EO-nyń birneshe elindegi áýejaılardyń jumysynda eleýli irkilisterge ákeldi.
Airports Council International málimetinshe, Frantsııa, Germanııa, Belgııa, Italııa, Ispanııa jáne Gretsııa elderindegi jolaýshylar shekaralyq baqylaýda úsh saǵatqa deıin aıaldady.
ACI-diń Eýropadaǵy bólimshesiniń basshysy Olıve Jankovets jaǵdaıdyń qarbalas ýaqytta kúrt nasharlap jatqanyn jáne jazǵy demalys maýsymy bastalǵanda iri kólik daǵdarysyna aınalýy múmkin ekenin aıtty.
Ryanair kompanııasynyń bas dırektory Maıkl O’Lırı de jańashyldyqty qatań synǵa aldy. Ol júıeni engizýdi «beıbereketsizdik» dep atap, ony tolyq paıdalanýdy kúzge deıin keıinge qaldyrýdy usyndy. Sondaı-aq keıbir áýejaılarda kútý ýaqyty 4 saǵatqa deıin jetetini aıtyldy.
Al Eýropalyq komıssııa kúrdeli problemalardyń baryn moıyndamaı otyr. Olardyń málimetinshe, júıe turaqty jumys isteıdi, bir jolaýshyny tekserip, ótkizýdiń ortasha ýaqyty shamamen 70 sekýnd.
ACI ókilderi protsedýranyń naqty uzaqtyǵy birneshe ese joǵary bolýy múmkin ekenin aıtyp, Eýropalyq komıssııanyń kórsetken shamasy eń tómengi ýaqyt dep sanaıdy.
EES júıesi pasporttarǵa mór basýdyń ornyna engizilgen jáne EO-ǵa kirmeıtin elderdiń azamattary úshin mindetti bıometrııalyq tirkeýdi kózdeıdi — oǵan fotoǵa túsirý jáne saýsaq izderin alý kiredi.
2026 jylǵy 10 sáýirge qaraı júıege Shengen aımaǵyna kiretin barlyq 29 el qosyldy. Al EO azamattary, turýǵa ruqsaty bar adamdar jáne dıplomattar bul rásimnen bosatylǵan.
Buǵan deıin jolaýshylar aǵyny boıynsha kóshbasshy áýejaılar týraly jazdyq.
Astana áýejaıynda ushý-qoný jolaǵynda josparly jóndeý jumystary júrgizilýine baılanysty reıster kestesine ýaqytsha ózgerister engiziledi.
