4 paıyzdyq eko-nesıeler kimge beriledi
«Ulttyq qoryqtardyń mańaıynda turatyn eldi mekender úshin arnaıy nesıeler qarastyrylǵan. Aýyl turǵyndary aǵash kesip, balyq aýlamas úshin biz olarǵa shaǵyn qonaq úı ashý, toǵan sharýashylyǵyn damytý, orman alqaptaryn ósirý, ıa bolmasa, ara sharýashylyǵyn júrgizý sııaqty kásip túrlerin ashýǵa demeý jasaımyz. Qarjylaı qoldaý da bar. Adamdar nesıeni 4 paıyzben ala alady», - dedi BUU Damý baǵdarlamasynyń bıoalýandylyqty saqtaý jónindegi jobalardyń menedjeri Talǵat Kerteshev QazAqparat tilshisine bergen suhbatynda.
Onyń aıtýynsha, halyq arasynda «Eko-Damý» shaǵyn nesıeler baǵdarlamasyna suranys joǵary. Sebebi paıyzdyq mólsherlemesi tómen. «Máselen, biz 1,5 mln dollardy Aýyl sharýashylyǵyn qoldaý qory arqyly Barsakelmes, Ústirt, Altynemel jáne Іle-Balqash rezervaty tóńireginde turatyn elde mekenderge taratyp berdik. Ony jarty jyldyń ishinde talap áketti. 83 jobanyń aıasynda 200-den astam jumys orny ashyldy. Endi, kelesi jylda nesıe qaıtarylady. 2019 jyly bastap baǵdarlamanyń ekinshi kezeńi bastalady. Onymen tórt qoryq emes, 26 qoryqty qamtý josparlanǵan. Sondyqtan osy jumysqa aýyl sharýashylyǵy mınıstrligi tarapynan da aqsha bólinýi kerek. Óıtkeni 1,5 mln dollar az bolady», - dep atap kórsetti Kerteshev.
«Eko-Damý» baǵdarlamasynyń birinshi kezeńine ilikkenderdiń ishinde Quralaı Shamuratova da bar. Osydan eki jyl buryn ol 2 mln teńge kóleminde eko-nesıeni alyp, óz kásibin dóńgeletip alyp ketti. Ózi aýylda bastaýysh synyptarǵa sabaq beredi. Onymen birge kórpe, jastyq, qazaqy kıimderdi tigý sııaqty kásipti ashyp aldy.
Búgin Quralaı Shamuratova ózi jasaǵan bir buıymdy BUU Damý baǵdarlamasynyń Qazaqstandaǵy turaqty ókiliniń orynbasary Altangerel Mýnhtýıa hanymǵa tabystady. 
«Bul - notbýkke arnalǵan qoldorba. Onyń ishi kıizben, syrty masatymen qaptalǵan. Ondaı qoldorbamen noýtbýkty qysta ustaǵan yńǵaıly. Sýyq ótpeıdi. Bir jerge kirgennen keıin noýtbýktyń jylyǵanyn kútpeı-aq birden jumys isteýge bolady. Al jasyl túspen jasaǵanym - Qazaqstannyń tabıǵaty gúldep, kógere bersin degenim. Negizi, maǵan qandaı adam kelse, betin qaıtarmaımyn. Suraǵan nársesin istep berýge tyrysamyn. Aýyldyń ómirin bilesiz ǵoı, túske deıin úıdiń jumysy, bala-shaǵa degendeı, tústen keıin mektepte sabaq beremin. Al úıge kelgen soń, túnimenen otyrsam da, tapsyrystardy oryndaımyn», - deıdi Quralaı Shamuratova.
