4 paıyzdyq avtonesıe nege kelmeske ketti – mınıstr jaýaby

ASTANA. KAZINFORM – Ónerkásip jáne qurylys mınıstri Qanat Sharlapaev Úkimet otyrysynan keıin ótken baspasóz máslıhatynda 4 paıyzdyq avtonesıe nege kelmeske ketkenin aıtty.

«Bul suraqqa osyǵan deıin de jaýap bergenbiz. Jeńildetilgen nesıege eshkimniń kóńili tolyp otyrǵan joq. Sebebi túsinikti, nıet bildirýshiler kóp, al bólinetin aqsha shamaly. Biraq avtoóndirýshiler de, qarjy naryǵy da bir orynda toqtap turmaıdy. Mysaly, qazir Úkimet zańnamalyq turǵyda jeke tulǵalarǵa lızıngti engizý tetigin qoldap otyr. Ekinshiden, avtokólik satatyn kompanııalardyń ózi ártúrli qarjylyq quraldardy paıdalanyp, kólikti bólip tóleýge bolatyn jaǵdaı jasady», – dedi mınıstr.

Qanat Sharlapaev jeńildetilgen avtonesıeden túsken qarajat qoǵamdyq kólikterdi damytýǵa baǵyttalatynyn eske saldy.

«Jeńildetilgen avtonesıege bólingen qarajat óte durys boldy dep oılaımyn. Qarajat qalalar men oblys ortalyqtarda qoǵamdyq kólikterdi qoldaýǵa baǵyttaldy. Biz qalaishilik qana emes, aýdanaralyq kólikterge de jumsadyq. Mundaı ustanym durys dep esepteımin. Avtokólikterge jeńildetilgen nesıe berýdiń ornyna qoǵamdyq kólikterdiń sapasyn arttyrýǵa jumsap otyrmyz. Sebebi ony halyq kóbirek paıdalanady. Jeńildetilgen avtonesıeni biz bir jarym jyl buryn japtyq. Qazir ol qarajat qoǵamdyq kólikterdi damytýǵa baǵyttalyp otyr», - dedi Qanat Sharlapaev.