4 óńirdiń dárigerlerine turǵyndardan shaǵym kóp – Ajar Ǵınııat

Úkimet otyrysynda Densaýlyq saqtaý mınıstri Ajar Ǵınııat densaýlyq saqtaý júıesindegi ózekti máselelerdi atady, dep habarlaıdy QazAqparat tilshisi.

«Birinshi - medıtsınalyq kómektiń tolyq qoljetimdiligin qamtamasyz etý. Bul máseleler boıynsha halyqtan shaǵymdardyń eń kóp sany Astana, Almaty qalalaryna, Aqmola, Atyraý oblystaryna tıesili ekenin atap ótken jón. Sonymen qatar, mindetti áleýmettik medıtsınalyq saqtandyrý júıesinde 3,3 mln halyq saqtandyrylmaǵan kúıinde qalyp otyr. Eń kóp sany Jetisý, Almaty, Jambyl oblystarynda jáne Shymkent qalasynda baıqalady», - dedi mınıstr.

Ekinshiden, onyń atap ótýinshe, medıtsınalyq kadrlarǵa degen qajettilik tómendeýine qaramastan áli de saqtalýda. Bul kórsetkish Qostanaı, Aqmola, Soltústik Qazaqstan, Túrkistan, Batys Qazaqstan oblystarynda basym.

«Úshinshi – medıtsınalyq obektilerdiń ınfraqurylymy áli de jetkiliksiz. Búginde 200-den astam aýyldyq eldi mekende medıtsınalyq obektiler joq. Ǵımarattardyń tozýy 56, medıtsınalyq tehnıkamen jaraqtandyrý 50 paıyzdy quraıdy», - dedi Ajar Ǵınııat.