4 óńirde juqpaly aýrýlar týraly shuǵyl habarlaý júıesi synaqtan ótip jatyr
ASTANA. KAZINFORM — DSM Sanıtarııalyq-epıdemıologııalyq baqylaý komıteti «Epıdemıolog» aqparattyq júıesiniń «Shuǵyl habarlamalar» modýlin engizý boıynsha pılottyq jobany iske asyryp jatyr.
Joba sanepıdqyzmetti tsıfrlandyrýǵa jáne epıdemıologııalyq monıtorıng júıesin jetildirýge baǵyttalǵan. Qazirgi ýaqytta pılottyq joba Shyǵys Qazaqstan jáne Pavlodar oblystarynda, sondaı-aq Astana jáne Almaty qalalarynda júzege asyrylyp jatyr.
Jańa modýl ınfektsııalyq aýrýlar týraly shuǵyl habarlamalardy elektrondyq formatta jiberýge kóshýdi kózdeıdi. Aqparat medıtsınalyq uıymdardyń medıtsınalyq aqparattyq júıelerinen sanepıdbaqylaýdyń aýmaqtyq bólimshelerine tikeleı joldanatyn bolady.
Bul tásil aqparatty berý úderisin ońtaılandyrýǵa, sondaı-aq qaǵaz qujattardy resimdeý men óńdeýge baılanysty jumystardyń kólemin qysqartýǵa múmkindik beredi.
Elektrondyq formatty engizý medıtsınalyq uıymdar men sanepıdqyzmet úshin birqatar artyqshylyqtar berýge baǵyttalǵan.
Atap aıtqanda, ınfektsııalyq aýrýlar týraly aqparatty berý ýaqytyn qysqartady, medıtsına qyzmetkerleri men sanepıdqyzmet mamandaryna túsetin ákimshilik júktemeni azaıtady, qaǵaz qujat aınalymyn qysqartyp, derekterdiń qaıtalanýyn boldyrmaıdy, aqparatty berý kezinde jiberiletin qatelerdiń yqtımaldyǵyn barynsha azaıtady, epıdemıologııalyq monıtorıng júrgizý jáne qajetti epıdemııaǵa qarsy sharalar qabyldaý jedeldigin arttyrýǵa múmkindik beredi.
Aqparattyń ýaqtyly túsýi epıdemıologııalyq qaýip-qaterlerge jedel den qoıý jáne tıisti profılaktıkalyq is-sharalardy uıymdastyrý úshin mańyzdy.
Modýldi synaqtan ótkizý medıtsınalyq uıymdar men sanepıdbaqylaýdyń aýmaqtyq bólimsheleri arasyndaǵy ózara is-qımyldyń jańa tetiginiń tıimdiligin baǵalaýǵa, ony jetildirý baǵyttaryn anyqtaýǵa jáne júıeni odan ári damytý jónindegi qadamdardy belgileýge múmkindik beredi.
«Shuǵyl habarlamalar» modýlin engizý sanepıdqyzmetti tsıfrlyq transformatsııalaý kezeńderiniń biri bolyp tabylady. Mundaı sheshimderdi iske asyrý epıdemıologııalyq qadaǵalaýdyń tıimdiligin arttyrýǵa, vedomstvoaralyq ózara is-qımyldy jetildirýge jáne halyqtyń densaýlyǵyna tónetin qaýip-qaterlerge jedel den qoıýdy qamtamasyz etýge baǵyttalǵan.
Aıta ketelik Jambyl oblysynda sańyraýqulaq ınfektsııasyn juqtyrǵandardyń 60 paıyzy balalar.
