4 óńirde medıtsınalyq ústemeaqy tóleý kezinde jasalǵan zańsyz áreketter anyqtaldy

NUR-SULTAN. QazAqparat - Sybaılas jemqorlyqqa qarsy is-qımyl agenttigi Densaýlyq saqtaý mınıstrligimen jáne jergilikti atqarýshy organdarmen birlesip, medıtsına qyzmetkerleriniń tapsyrmalaryn oryndaý kezinde sybaılas jemqorlyq kórinisterine qarsy is-qımyl máseleleri boıynsha keńes ótkizdi.

Keńesti ashqan Agenttik tóraǵasynyń birinshi orynbasary Oljas Bektenov Memleket basshysynyń 2021 jylǵy 18 shildedegi koronavırýstyq ınfektsııanyń taralýyn boldyrmaý jónindegi sharalar týraly keńeste bergen tapsyrmasy boıynsha vedomstvo júrgizgen jumystyń nátıjelerin usyndy.

«Pandemııadan týyndaǵan ekonomıkalyq qıyndyqtarǵa qaramastan, memleket karantındik is-sharalarǵa jumyldyrylǵan densaýlyq saqtaý qyzmetkerlerin qarjylaı qoldaýǵa 179 mlrd teńgeden astam qarajat bóldi. Bul qarajatty bólý Sybaılas jemqorlyqqa qarsy qyzmettiń jiti nazarynda», - dep atap ótti.

Agenttiktiń jedel-izdestirý sharalarynyń nátıjesinde 4 óńirde medıtsınalyq ústemaqy tóleý kezinde medıtsınalyq uıymdardyń laýazymdy tulǵalary tarapynan (Shymkent q., Almaty, Aqmola jáne Jambyl oblystary) zańsyz is-áreketter faktileri anyqtaldy.

Keńeste zańsyz tólemniń eń kóp taralǵan qylmystyq shemalary jáne olardyń quqyqtyq saldary aıtyldy.

Sondaı-aq aýdıtorııanyń nazaryna taldaý barysynda anyqtalǵan Densaýlyq saqtaý uıymdarynyń qyzmetindegi sybaılas jemqorlyq kórinisterine yqpal etetin faktorlar usynyldy.

Antıkor pysyqtaǵan materıaldardy ákimdikter sybaılas jemqorlyq quqyq buzýshylyqtardyń aldyn alýdy kúsheıtý úshin paıdalanatyn bolady.