4 oblysta balabaqshalarda vıdeobaqylaý az ornatylǵan - Vladımır Bojko

ASTANA. QazAqparat - Depýtattar óńirlerge saparlaǵan kezde balabaqshalardyń vıdeobaqylaý qurylǵylarymen jabdyqtalýyna nazar aýdarady. Bul týraly QHA depýtattyq tobynyń otyrysynda Parlament Májilisi tóraǵasynyń orynbasary Vladımır Bojko málim etti, dep habarlaıdy QazAqparat.

«Qazirgi kezde QR Bilim jáne ǵylym mınıstrligi ákimdiktermen birlese tıisti «Jol kartasyn» daıarlap jatyr. Onda mektepke deıingi uıymdarǵa pedagogtar biliktiligin arttyrý, oqý ornyndary tapshylyǵyn joıý, búldirshinderdiń qaýipsizdigin arttyrý sekildi sharalar eskerilgen. Osy oraıda, qosymsha 4 myń vıdeobaqylaý kameralaryn ornatý qarastyrylǵan», - dep toqtaldy V. Bojko.

Bilim jáne ǵylym mınıstrliginiń málimetine qaraǵanda, búginde balabaqshalarda vıdeobaqylaýmen qamtamasyz etilý deńgeıi 58 paıyzǵa jetken.

«ıAǵnı, bul baǵytta tıisti jumystar atqarylǵanyn kórip otyrmyz. Degenmen de beınebaqylaý qurylǵylarymen qamtamasyz etilýdiń tómen deıgeıi Soltústik Qazaqstan, Qostanaı, Aqmola, Batys Qazaqstan oblystarynda baıqalyp otyr. Sondyqtan atalǵan óńirlerge jumys saparymen barǵanda osy máselege nazar aýdarýlaryńyzdy suraımyn», - dedi Májilis tóraǵasynyń orynbasary.

Esterińizge sala keteıik, Elbasy Nursultan Nazarbaev Qazaqstan halqyna arnalǵan bıylǵy Joldaýynda mektep pen balabaqshalardy beınebaqylaýmen qamtamasyz etýdi júktedi. 

Jaqynda QR Bilim jáne ǵylym vıtse-mınıstri Elmıra Sýhanberdıeva Qazaqstan mektepteri men balabaqshalaryn beınebaqylaý kameralarymen jabdyqtaý jumystary jóninde baıandady.