4 myńnan asa tegin preparat satylǵan: DSM tekseris nátıjelerin jarııalady
ASTANA. KAZINFORM — Densaýlyq saqtaý mınıstrligi tegin dári-dármekter aınalymynda zańbuzýshylyqtardy áshkereledi.
Densaýlyq saqtaý mınıstrligi 2024 jylǵy 1 shildeden bastap dárilik zattardyń aınalymyn tańbalaý júıesin paıdalana otyryp taldaý júrgizdi. «Tańbalanǵan taýarlardyń elektrondyq qujat aınalymy ortalyǵy» analıtıkalyq platformasynyń derekterine sáıkes, búkil el boıynsha dárihana uıymdarynda memleket kepildik bergen tegin medıtsınalyq kómektiń kólemi (TMKKK) sheńberinde qamtamasyz etýge arnalǵan 4114 preparattyń satylǵany anyqtaldy.
— 74 nysanǵa jospardan tys tekserý júrgizildi. Nátıjesinde 31 nysan ákimshilik jaýapkershilikke tartylyp, aıyppuldardyń jalpy somasy 12,3 mln teńgeni qurady, 43 uıymǵa buzýshylyqtardy joıý týraly uıǵarym berildi, — delingen habarlamada.
Naýqastarǵa TMKKK aıasynda berilgen dárilerdiń zańsyz satylý faktileri anyqtaldy. Birqatar jaǵdaıda medıtsınalyq uıymdar arqyly berilgen preparattar dárihana jelilerine túskeni belgili boldy.
Anyqtalǵan pozıtsııalar arasynda ınfýzııaǵa arnalǵan natrıı hlorıdi men glıýkoza eritindileri, keıbir antıbıotıkter jáne sozylmaly aýrýlardy emdeýge arnalǵan preparattar bar.
«Tsıfrlyq ekonomıkany damytý ortalyǵy» JShS aqparaty boıynsha, tańbalaý kodtaryn paıdalanýda júıeli buzýshylyqtar tirkelgen: 35 537 qaıta shyǵarý jaǵdaıy, ártúrli qatysýshylardyń bir kodty 480 752 ret paıdalanýy anyqtalǵan, sondaı-aq 1140 nysan 15 614 kodty qaıtadan aınalymnan shyǵarǵany belgili boldy.
Mınıstrlik málimetinshe, anyqtalǵan faktiler boıynsha materıaldar Qarjylyq monıtorıng agenttigine jáne Ulttyq qaýipsizdik komıteti Sybaılas jemqorlyqqa qarsy is-qımyl qyzmetine jiberildi. Qosymsha tekserýler júrgizilip jatyr, osy baǵyttaǵy jumys jalǵasady.
Osyǵan deıin elde 400-den astam jańa dári-dármek óndiriletinin jazdyq.