4 myńnan asa astanalyq BI qaıyrymdylyq marafonyna qatysty
ASTANA. KAZINFORM — Elordalyq Trıatlon saıabaǵynda kezekti BI Marathon qaıyrymdylyq marafony ótti.
2020 jyly koronavırýs pandemııasy kezinde toqtap qalǵan bul úrdis qaıta jandandy jáne sońǵy 6 jylda alǵash ret ótkizilip otyr.
Bul joly marafon «Taza Qazaqstan» ekologııalyq aktsııasyn qoldady. Jańbyrly aýa raıyna qaramastan, eriktiler men tazalyqshylar senbilik jasap, saıabaqtyń tazarýyna úles qosty. Osylaısha, sport pen ıgi ister ushtasyp, tazalyq pen salaýatty ómir saltyn nasıhattaýǵa baǵyttaldy.
Qaıyrymdylyq marafonynan jınalǵan jalpy qarajat kólemi osy aptada belgili bolady. Al marafon aıasynda 4 myńnan astam jelaıaq eki qashyqtyqta júgirip shyqty. Atap aıtqanda, 1174 qatysýshy 21 shaqyrymdy, 2872 qatysýshy — 10 shaqyrymdy eńserdi. Úsh júzden astam qatysýshy ózge óńirlerden keldi.
Bul rette uıymdastyrýshylar aýa raıynyń qolaısyzdyǵyna qaramastan, tirkelgen qatysýshylardyń 90 paıyzdan astamy júgirýge kelgenin aıtyp jatyr. Bul elordadaǵy júgirý mádenıeti qalyptasqanyn jáne olardyń kez kelgen tosyn jaǵdaıǵa shynyqqanyn kórsetedi. Óz kezeginde uıymdastyrýshylar da jańbyrly aýa raıy bolatynyn aldyn ala bilgen, alaıda Astananyń basty kósheleri jabylatyn bolǵandyqtan, sporttyq is-sharany ózge kúnge aýystyrý múmkin bolmaǵan. Sportshylarǵa yńǵaıly bolý úshin jaýyn sýyn ótkizbeıtin bir rettik jeletke berilip, shatyrlar tigilgen jáne ystyq taǵam men sýsyndar, jemis-jıdekter taratyldy.
Marafon qatysýshylarynyń qaýipsiz júgirip ótýin qamtamasyz etý maqsatynda saǵat 7:00–10:00 aralyǵynda elordanyń Qoshqarbaev dańǵyly, Qonaev, Dostyq, Aqmeshit kósheleri ishinara jabyldy.
Sonymen birge, júgirý merekesi balalarǵa da qýanysh syılady. 4-9 jas aralyǵyndaǵy balalar 400 metrge, 10-13 jastaǵy jetkinshekter — 1 shaqyrymǵa júgirip, mereke atmosferasyn sezine aldy jáne alǵashqy medaldaryn taqty. Starttyq sómkede balalarǵa estelik jumsaq oıynshyqtar tartý etildi.
Oǵan qosa, BI Fest aıasynda saıabaq aýmaǵynda túrli belsendilikter uıymdastyryldy: kelýshilerge tegin palaý taratyldy, fotozonalar, qazaqtyń ulttyq oıyndary jáne qatysýshylarǵa arnalǵan qyzyqty is-sharalar ótkizildi. Tanymal ánshi Sadraddın óner kórsetip, blogerler tikeleı reportaj júrgizdi. Qatysýshylar arasynda baǵaly syılyqtar tigilgen utys oıyny ótti.
Eske sala ketsek, 1 mamyrda Qazaqstan halqy Assambleıasynyń 30 jyldyǵyna oraı, elimizdiń barlyq óńirinde «Birlik júgirisi — 2025» respýblıkalyq marafony ótken edi. Sport merekesine el boıynsha 17 myń adam qatyssa, onyń 3 myńy elordada bas qosty.
Al Týrızm jáne sport mınıstri Erbol Myrzabosynov marafonǵa qandaı shekteý qoıylýy múmkin ekenin túsindirdi.