4 mıllıonnan astam qazaqstandyqtyń áleýmettik tólemderi 2 ret ındeksteldi

NUR-SULTAN. QazAqparat – Bıyl 4 mıllıonnan astam qazaqstandyqtyń áleýmettik tólemderi 2 ret ındeksteldi. Bul týraly Premer-Mınıstr Álıhan Smaıylov Úkimettiń keńeıtilgen otyrysynda aıtty, dep habarlaıdy QazAqparat tilshisi.

«Sizdiń tapsyrmańyz boıynsha jyl basynan beri eń tómengi jalaqy deńgeıi 60 myń teńgege deıin kóterildi. Bul 1,7 mln jaldamaly qyzmetkerdiń tabysyna oń áserin tıgizdi. Bıyl áleýmettik tólemder 2 márte ındeksteldi. Bul 4,1 mln adamnyń tabysyn qamtydy. Onyń 2,2 mıllıony – zeınetker», - dedi Álıhan Smaıylov.

Sondaı-aq, Úkimet basshysy azamattyq qyzmettegi 1,2 mln adamnyń jalaqysyn kezeń-kezeńimen arttyrý júrip jatqanyn aıtty.

«Mysaly, bilim berý men áleýmettik salada jalaqy 25% óse, densaýlyq saqtaý salasynda 20%-dan 30%-ǵa deıin artty.

Sondaı-aq, jeke jáne kvazımemlekettik sektordaǵy 1,5 mln qyzmetkerdiń jalaqysyn arttyrý boıynsha jumys júrgizildi.

Nátıjesinde, jyldyń alǵashqy 5 aıynda halyqtyń aqshalaı tabysy naqty mánde ótken jylmen salystyrǵanda 3% ósti», - dedi Úkimet basshysy.

Aıta keteıik, Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótti.

Memleket basshysy Qasym-Jomart Toqaev Halyqtyń tabysyn arttyrý baǵdarlamasyn synǵa aldy.

Prezıdenttiń jıynda sóılegen sóziniń tolyq mátini jarııalandy .