4 mıllıonnan astam azamatqa áleýmettik kómek berildi

NUR-SULTAN. QazAqparat – Áleýmettik tólem 4 mıllıonnan astam azamatqa berildi. Bul týraly «Habar 24» telearnasynyń tikeleı efırinen QR Aqparat jáne qoǵamdyq damý mınıstri Dáýren Abaev aıtty, dep habarlaıdy QazAqparat tilshisi.

Áleýmettik tólemderge toqtalǵan mınıstr: «Memleket basshysy málimdegendeı, búginge 4 mıllıonnan astam azamatqa áleýmettik járdem berildi. Mysaly, Almaty oblysynda 620 myńnan asa, Túrkistan oblysynda 508 myń, Almaty qalasynda 412 myń adam osyndaı tólem alǵan», - dedi.

Budan buryn habarlanǵandaı, Qazaqstan Prezıdenti Qasym-Jomart Toqaev halyqqa úndeý joldady.

«Taǵy da qaıtalap aıtamyn: qazirgideı kúrdeli kezde árbir azamat bizdiń nazarymyzda bolady. Memleket eshkimdi qıyndyqta qaldyrmaıdy. Men tótenshe jaǵdaı kezeńinde azamattarymyzǵa qoldaý kórsetýge arnalǵan sharalardyń eki toptamasyn jarııa ettim. Bul sharalar barynsha júzege asyrylýda. Qoǵam tarapynan aıtylǵan oryndy syn-pikirler de bar. Ony eskeremiz. Búgingi kúni 4 mıllıon 250 myń azamatqa qarjylaı kómek kórsetildi», - dedi Memleket basshysy.

Prezıdent kelesi aıda da azamattarǵa 42 500 teńge kóleminde kómek beriletinin málim etti.