4 maýsymda Ulttyq biryńǵaı testileý bastalady

Bul osymen 8-shi ret ótkizilgeli otyrǵan shara. Osyǵan oraı búgin Bilim jáne ǵylym mınıstrliginiń ókilderi jýrnalıstermen baspasóz-máslıhatyn uıymdastyryp, mańyzdy naýqannyń barysy jóninde pikir almasty.

Bilim jáne ǵylym vıtse-mınıstri Serik Yrsalıevtyń aıtýynsha, Ulttyq biryńǵaı testileý sharasy ótkizilgen 7 jyldyq tájirıbe - osy sharanyń aldyǵa qoıǵan mindetterdi talapqa saı júzege asyryp otyrǵandyǵyn kórsetti. «Atap aıtqanda, oqýshylardyń bilimderin syrttaı, obektıvti túrde táýelsiz baǵalaý maqsaty oryndaldy. Joǵary bilimge, ásirese memleket esebinen joǵary bilimge qol jetkizýge degen áleýmettik ádilettilik saltanat qurdy. Sonymen qatar ulttyq biryńǵaı testileý aýyl balalarynyń joǵary oqý ornyna ózderiniń aýyldarynda otyryp-aq túsýlerine múmkindik týdyrdy. Osy shara arqyly biz aýyl balalary ósip jatqan otbasylardyń kiristerin shamamen alǵanda jylyna jarty mıllıard teńgege únemdep otyrmyz.Buryndary balalarǵa qandaı da bir ýnıversıtetke túsý qajet bolsa, olar jol kiresi men turatyn oryndaryna qarjy shyǵyndaı otyryp, mindetti túrde sol joǵary oqý ornyna kelýleri kerek bolatyn. Al qazir UBT-nyń engizilýine oraı osy mindetterdiń barlyǵy memleket óz moınyna aldy»,-dedi mınıstrdiń orynbasary.

Onyń sózine qaraǵanda, UBT qoldanylǵan 7 jyl ishinde oǵan 1 mılıon mektep túlekteri qatysty. Al bıylǵy jyly UBT 154 tirekterde júzege asyrylady. Olardyń 105-i - aýyldyq aımaqtarda, 49-y ýnıversıtetterde uıymdastyrylǵan.