4 mamyrdan bastap Astanada «ASTRA PLAT» ataýly kólik kartalary taratylady

ASTANA. QazAqparat - 2016 jylǵy 4 mamyrda azamattardyń jeńildetilgen sanatyna ataýly kólik kartalary taratyla bastaıdy. Atalǵan shara elordalyq qoǵamdyq kólikte «ASTRA PLAT» elektrondy jolaqy tóleý júıesin engizý aıasynda júzege asyrylady, dep habarlady qala ákiminiń resmı saıty.

Fototirkeýden ótken azamattardyń jeńildetilgen sanatyna jatatyn adamdar ataýly kólik kartasyn kún saıyn saǵat 10.00-den 18.00 deıin Respýblıka dańǵyly, 34 mekenjaıy boıynsha «Jastar» saraıy ǵımaratynda ornalasqan pýnktten ala alady. Derbestendirilgen kartalardy berý ústimizdegi jyldyń mamyr aıynyń sońyna deıin júrgiziledi. Aıta keteıik, jekelegen sanattar úshin kartalar úılerine deıin jetkiziledi.

Qazirgi kezde elordada tómende kórsetilgen azamattardyń sanattary qoǵamdyq kólikpen tegin jol júredi:

- UOS ardagerleri men olarǵa teńestirilgen tulǵalar;

- jasyna qaraı jáne eńbek ótili boıynsha zeınetke shyqqandar;

- jasyna qaraı jáne asyraýshysynan aıyrylýy boıynsha memlekettik áleýmettik járdemaqy alatyndar;

- kóp balaly otbasylar;

- múmkindigi shekteýli tulǵalar;

- 16 jasqa tolmaǵan múgedek balalar.

Eske salaıyq, 2015 jyly tamyzda Astanada qoǵamdyq kólikpen tegin jol júrýge quqyly jolaýshylardyń sýretteri men jeke málimetter bazasyn qurý maqsatynda azamattardyń jeńildetilgen sanaty sýretke túsirilip, tirkeýden ótken bolatyn. Osy maqsatta 25 pýnkt ashyldy. Al sýretke túsip úlgermegender úshin protsedýra ótken jylǵy jeltoqsan aıyna deıin uzartyldy.