4 mamyr kúni «Áskerı ánder» atty mádenı shara ótpek
ASTANA. 3 mamyr. QazAqparat/Aınur Kenebaeva/ - Qazaqstan Respýblıkasy Prezıdenttik mádenıet ortalyǵynyń kórme zalynda 4 mamyr kúni Uly Jeńistiń 66 jyldyǵyna arnalǵan «Áskerı ánder» atty mádenı shara ótpek. Bul týraly Prezıdenttik mádenıet ortalyǵynyń baspasóz ortalyǵynan habarlady.
Sharaǵa armııa generaly Saǵadat Nurmaǵanbetov atyndaǵy «Jas Ulan» respýblıkalyq áskerı mektebiniń ulandary men Uly Otan soǵysy ardagerleri qatyspaq.
Іs-sharanyń maqsaty - elin, jerin jaýdan jan aıamaı qorǵaǵan aǵa býyn ókilderiniń erlikterin úlgi ete otyryp, jastardy otan súıgishtikke baýlý, úlkendi syılaýǵa, babalar tilegi bolǵan, qanshama qurbandyqpen qol jetken táýelsizdigimizdi qurmetteı, qasterleı bilýge tárbıeleý, Qazaqstannyń keleshegi úshin aıanbaı eńbek etýge shaqyrý.
Іs-shara barysynda patrıottyq rýhtaǵy áskerı ánder oryndalyp, surapyl soǵys zamanyn kózimen kórgen kýágerler tarıhtyń mańyzdy estelikterin baıandaıdy.
Sonymen qatar, atalmysh shara aıasynda «El úmitin er aqtar, Er ataǵyn el saqtar» atty kórme uıymdastyrylmaq. Kórme jumysy barysynda kelýshilerdiń nazaryna «Uly Otan soǵysynyń bastalýy», «Brest qamaly», «Moskva túbindegi shaıqas», «Stalıngrad túbindegi shaıqas», «Lenıngrad qorshaýy», «Shyǵystyń qos shynary», «Reıhstagqa tý tigý», «Jeńis sherýi» syndy taqyryptaǵy 15 planshet, murajaı qorynan alynǵan Uly Otan soǵysynda paıdalanylǵan qarý-jaraqtar, jeńiske jetý jolyndaǵy Keńes Odaǵynyń eki márte batyry Talǵat Bıgeldınovtyń, ózge de Uly Otan soǵysy batyrlarynyń jeke zattary, áskerı kıimderi, sonymen qatar soǵysta paıdalanylǵan basqa da jádigerler jurtshylyq nazaryna usynylmaq.
Shara sheńberinde Uly Otan soǵysynyń tarıhy jaıly maǵlumat beretin «Umytylmas uly erlik» atty kitap kórmesin de uıymdastyrý josparlanǵan.
