4 qyrkúıek. Kazinform kúntizbesi. Jylnama
Kazinform oqyrman nazaryna 4 qyrkúıekke arnalǵan ataýly kúnder men este qalar oqıǵalar kúntizbesin usynady.
Halyqaralyq taekvondo kúni
Bul kúndi Dúnıejúzilik taekvondo federatsııasy 2006 jyly Vetnamnyń Hoshımın qalasynda ótken Bas assambleıada resmı túrde bekitti.
Merekeniń 4 qyrkúıekte atap ótilýi kezdeısoq emes. 1994 jyly dál osy kúni Halyqaralyq Olımpıada komıteti taekvondony resmı túrde olımpıadalyq sport túrleriniń qataryna qosty.
Taekvondodan jarystar alǵash ret 2000 jyly Sıdneıde ótken jazǵy Olımpıada oıyndarynyń baǵdarlamasyna engizildi.
ESTE QALAR OQIǴALAR
2009 jyly Qazaqstan Respýblıkasyndaǵy Birikken Ulttar Uıymynyń Damý baǵdarlamasy men «Samuryq-Energo» AQ Qazaqstanda jel jáne kún elektr stantsııalaryn salý jobalaryn júzege asyrý úshin jańartylatyn energııa kózderin paıdalaný salasyndaǵy yntymaqtastyq týraly memorandýmǵa qol qoıdy.
2009 jyly Astanada qala ákimdigi aldyndaǵy alańnan alǵash ret «Halyqtar dostyǵy-2009» V halyqaralyq avtosherýi bastaldy.
2010 jyly Máskeýdegi Kıno úıinde TMD jáne Baltyq elderi ulttyq kınematografııasynyń XIV forýmy aıasynda qazaqstandyq rejısser Rashıd Nuǵmanovtyń «Ine. Remıks» fılminiń premerasy ótti.
Jańa fılmge «Ine» kartınasyna deıin túsirilgen, biraq onyń bastapqy nusqasyna enbegen materıaldar, sondaı-aq komıkske uqsas grafıkalyq elementter qosyldy.
2013 jyly Qazaqstan Respýblıkasy Sankt-Peterbýrgte ótken «Úlken jıyrmalyq» (G20) sammıtine EAEO, Keden odaǵy jáne Táýelsiz Memleketter Dostastyǵynyń ókili retinde shaqyryldy.
G20 jumysyna qatysý Qazaqstan úshin óz kún tártibin jahandyq deńgeıde ilgeriletýge, syrtqy saıası jáne halyqaralyq bedelin nyǵaıtýǵa múmkindik berdi.
2016 jyly Astanada aýqymdy sporttyq shara – «Astana marafony» halyqaralyq qaıyrymdylyq jarysy bastaldy.
Jarysqa álemniń 25 elinen, sonyń ishinde AQSh, Frantsııa, Italııa, Japonııa, Avstralııa, Germanııa, Iran, Irlandııa, Belgııa, Reseı, Brazılııa, Estonııa, Qytaı, Ońtústik Koreıa, Túrkııa, Grekııa, Kanada, BAÁ jáne Nıderlandtan kelgen sportshylardy qosa alǵanda 4 500 adam qatysty.
Júgirýshiler tańerteń «Han Shatyr» saýda-oıyn-saýyq ortalyǵy mańynan start alyp, 1, 10, 21 jáne 42,2 shaqyrymdyq qashyqtyqtardy baǵyndyrdy.
2019 jyly Astanada Azııa elderi jazýshylarynyń alǵashqy forýmy ótti. Onyń maqsaty – Azııa qurlyǵyndaǵy memleketter arasyndaǵy ádebı jáne mádenı baılanystardy nyǵaıtyp, odan ári damytý.
Aýqymdy halyqaralyq is-sharaǵa alǵash ret Qytaı, Úndistan, Reseı, Iran, Japonııa, Túrkııa, Saýd Arabııasy, Birikken Arab Ámirlikteri, Izraıl, Ońtústik Koreıa, Ońtústik-Shyǵys jáne Ortalyq Azııa memleketterin qosa alǵanda, Azııanyń 44 eliniń ókilderi qatysty.
Forým qorytyndysy boıynsha Azııa ádebıetin damytý jáne ádebı jobalardy qoldaý máseleleri jóninde forým delegattarynyń Azııa memleketteri men úkimet basshylaryna úndeýi qabyldandy.
2020 jyly Shyǵys Qazaqstandaǵy Eleke sazy alqabynan arheologtar biregeı artefaktiler tapty. Tabylǵan 850 altyn buıym saq bıleýshisiniń at ábzelderin bezendirýge arnalǵan áshekeıler bolǵan.
Jasalý tehnologııasy, materıaldary, pishini men sıýjetine qaraı altyn áshekeıler aldyn ala b.z.d. V-IV ǵasyrlarǵa jatqyzyldy. Olar Tarbaǵataı saqtary óneriniń eskertkishteri sanalady. Áshekeılerdiń biregeıligi olardyń ózindik ereksheligi, baı bezendirilýi jáne joǵary sapaly oryndalýynan kórinedi.
2020 jyly túrkologııa mamandyǵy boıynsha bilim alyp júrgen stýdentterdiń alǵashqy Quryltaıy ashyldy.
Oǵan Ázerbaıjan, Qazaqstan, Qyrǵyzstan, Túrkııa jáne Ózbekstannan kelgen stýdentter qatysyp, túrki halyqtarynyń folklory, ádebıeti, til bilimi men dástúrlerin zertteý boıynsha baıandamalar jasap, pikir almasty.
Alǵashqy Quryltaı túrkologııa kafedralary keńesiniń otyrysynda qabyldanǵan sheshimderdiń júzege asýynyń kórinisi boldy.
2021 jyly Tokıoda ótken Paralımpıada oıyndarynda Qazaqstan medal sany boıynsha tarıhı rekord ornatty. El quramasy bir altyn, eki kúmis jáne bir qola medal ıelendi.
Jarysta paýerlıfter Davıd Degtıarev, dzıýdoshylar Temirjan Dáýlet, Anýar Sarıev, Zarına Baıbatına jáne júzýshi Nurdáýlet Jumaǵalı el namysyn qorǵady.
2021 jyly Taraz turǵyny Qyzyl juldyz aýylynyń mańynan kóne tıyndar kómbesin tapty. Kómbedegi kúmis buıymdar usaq bólikterge kesilgen bolyp shyqty.
Ǵalymdardyń boljamynsha, qazyna kezinde saýdagerlerdiń birine tıesili bolýy múmkin. Rafael Iskanderov salmaǵy jarty kelige jýyq kóne kúmisti tarıhı-mádenı mýzeıge tapsyrdy.
Arheologtardyń aıtýynsha, mundaı kólemdegi artefaktiler buryn-sońdy kezdespegen. Tıyndardyń soǵylý erekshelikterin zerttegen mamandar kúmistiń Samanıdter dáýirine, shamamen X ǵasyrdyń ortasyna tıesili ekenin anyqtady.
2023 jyly Astanadaǵy EXPO halyqaralyq kórme ortalyǵynda «Qonaqjaı ólke. Sapaly óndiris» uranymen Shandong Heavy Industry Group (SHIG) kompanııasynyń Jahandyq seriktester forýmy men ónimder kórmesiniń saltanatty ashylýy ótti.
Іs-shara TMD óńirindegi seriktestermen yqpaldastyqty kúsheıtý, tájirıbe almasý jáne yntymaqtastyqtyń jańa baǵyttaryn damytý maqsatynda uıymdastyryldy. Oǵan TMD elderi úkimetteriniń ókilderi, dılerler, óńirler men mýnıtsıpalıtetterdiń basshylary, otandyq jáne sheteldik BAQ ókilderi qatysty.
Konferentsııada SHIG kompanııasynyń sońǵy ǵylymı-tehnıkalyq ınnovatsııalary, sonyń ishinde jańa avtomobıl ázirlemeleri men kúshtik qondyrǵylar salasyndaǵy ozyq tehnologııalar tanystyryldy.
Sondaı-aq qatysýshylarǵa joǵary tehnıkalyq sıpattamalary men zamanaýı tehnologııalarynyń arqasynda álemdik naryqta moıyndalǵan júk kólikteri, avtobýstar jáne arnaıy tehnıkanyń keń aýqymy kórsetildi.
2023 jyly Qazaqstanda otbasylarǵa, áıelder men balalarǵa kómek kórsetetin biryńǵaı telefon nómiri iske qosyldy.
Tsıfrlyq damý, ınnovatsııalar jáne aeroǵarysh ónerkásibi mınıstrligi baılanys qyzmetin paıdalanýshylar tegin habarlasa alatyn jedel medıtsınalyq, quqyq qorǵaý, órt sóndirý, avarııalyq jáne basqa da qyzmetterdiń tizimin tolyqtyrdy.
111 nómiri arqyly qazaqstandyqtarǵa aqparattyq-anyqtamalyq jáne uıymdastyrýshylyq sıpattaǵy tegin baılanys qyzmetteri, psıhologııalyq kómek, sondaı-aq azamattardyń zańdy quqyqtaryn qamtamasyz etýge qatysty barlyq másele boıynsha bastapqy konsýltatsııalar kórsetile bastady.
2024 jyly Aqmola oblysynyń sportshysy Davıd Degtıarev Paralımpıada oıyndarynda 54 kelige deıingi salmaq dárejesinde altyn medal jeńip alyp, Qazaqstan tarıhyndaǵy tuńǵysh eki dúrkin Paralımpıada chempıony atandy.
Dastan Muqashbekov Paralımpıada oıyndarynda ıadro laqtyrýdan qola medal ıelendi. Ol 16 metr nátıje kórsetip, Azııanyń jańa rekordyn ornatty.
2025 jyly Astanadaǵy EXPO kórme kesheninde Qazaqstandaǵy jasandy ıntellektpen jumys isteýge arnalǵan alǵashqy avtonomdy sýperkompıýter tanystyryldy.
Júıe memlekettik organdar men iri kompanııalarǵa ınternetke qosylmaı-aq jáne derekterdiń syrtqa taralý qaýpinsiz jasandy ıntellekt tehnologııalaryn paıdalanýǵa múmkindik beredi. Otandyq sýperkompıýterdiń jasalýy Qazaqstannyń tsıfrlyq táýelsizdigin qamtamasyz etý jolyndaǵy mańyzdy qadam sanalady.
Júıeniń negizgi elementi – ártúrli neırojelilerdi biryńǵaı keńistikte biriktiretin mýltıagenttik platforma. Onyń kómegimen tsıfrlyq agentterden turatyn komandalar qurýǵa bolady. Olardyń bir bóligi derekterdi taldasa, endi biri mátin ázirleıdi, al úshinshisi josparlaý mindetterin atqarady.
