4 qazan – Qarýly kúshterdiń Zymyran áskerleri men artıllerııasy kúni
ASTANA. KAZINFORM - Zymyran áskerleri men artıllerııa Qurlyq áskerleriniń quramyna kiredi jáne qarsylastyń atys quraldaryn, áskerı tehnıkasy men jeke quramyn joıý, qorǵanys qurylystaryn qıratý, sondaı-aq jalpyáskerı bólimsheler men quramalardy atyspen qoldaý mindetterin oryndaıdy, dep habarlaıdy QR Qorǵanys mınıstrliginiń baspasóz qyzmeti.
Artıllerııanyń qazirgi zamanǵy jaýyngerlik múmkindikteri barlaý maqsatyndaǵy ushqyshsyz ushý apparattaryn, avtomattandyrylǵan basqarý júıelerin jáne jańǵyrtylǵan qarý-jaraq úlgilerin qoldaný arqyly keńeıip keledi. UUA nysanalardy jedel anyqtap, olar týraly derekterdi berýdi qamtamasyz etedi, al avtomattandyrylǵan basqarý júıeleri aqparat alynǵan sátten bastap atys mindetin oryndaýǵa deıingi ýaqytty qysqartady.
Atys dáldigi topogeodezııalyq, meteorologııalyq jáne ballıstıkalyq qamtamasyz etý júıeleri arqyly da qamtamasyz etiledi. Bul quraldar atys pozıtsııalary men nysanalardyń koordınattaryn, meteorologııalyq jaǵdaılar men ballıstıkalyq ólshemderin atys mindetterin daıyndaý jáne oryndaý kezinde eskerýge múmkindik beredi.
Zymyran áskerleri men artıllerııa mamandaryn daıarlaý birneshe deńgeıde júzege asyrylady. Qurlyq áskerleriniń áskerı ınstıtýty jyl saıyn 60-qa deıin artıllerıst-ofıtserdi daıarlap shyǵarady. Operatıvtik-taktıkalyq deńgeıdegi ofıtserlerdi daıarlaý Qazaqstan Respýblıkasy Ulttyq qorǵanys ýnıversıtetinde júrgiziledi.
Áskerı daıarlyqtan ótken rezerv, sonyń ishinde, Qaraǵandy tehnıkalyq ýnıversıteti men Satbayev University áskerı kafedralaryn bitirgen túlekter esebinen qalyptastyrylady. Serjanttar quramyn daıarlaý áskerı kolledjde, al artıllerııalyq jáne mınomettik eseptoptarǵa arnalǵan kishi mamandardy daıyndaý Qurlyq áskerleriniń oqý ortalyǵynda júzege asyrylady.
Qazaqstan Respýblıkasy Qarýly kúshteriniń Zymyran áskerleri men artıllerııasynyń qalyptasýy men damýyna generaldar Lýt Alchekenov, Asqar Jolamanov, Rýslan Shpekbaev, polkovnıkter Mıhaıl Shleıko, Dáýren Esqojın, Nıkolaı Mısıýra, Vıktor Kashoıd, Aleksandr Teplıakov, Anvar Ózbekov jáne Ǵınııatqalı Shalabaev eleýli úles qosty.
Osyǵan deıin elimizdiń áýe qorǵanysy kúshteri jasandy ıntellekt elementteri bar júıelerdi synaǵany týraly jazdyq.
