4 qańtardan bastap Semeı avtobýstarynda elektrondy bılet júıesi engiziledi
SEMEI. QazAqparat – Semeı qalasyndaǵy avtobýstardyń bárine elektrondy bıletteý júıesi engiziledi, dep habarlaıdy QazAqparat tilshisi qala ákimi Ermak Sálimovke silteme jasap.
«2020 jyldyń 4 qańtarynan bastap Semeı qalasyndaǵy barlyq avtobýstar, ıaǵnı, úsh avtoturaq elektrondy bılet júıesine kóshedi. Bul kúni qala turǵyndary 160 myń kólik kartasymen qamtylady dep josparlanǵan. Eger kartalar bolǵanda biz elektrondyq bılet júıesin burynyraq engizip qoıar edik», - dep atap ótti Ermak Sálimov.
Sonymen qatar ákim kólik kartasy jáne mobıldi qurylǵymen tólem jasaý aqysy burynǵysha 80 teńge bolyp qalatynyn aıtty. Qala basshysy depýtattarmen kelisip, Ádilet mınıstrliginde tirkegennen keıin bir baǵytqa jol aqysy 140 teńge bolatyn saralanǵan tarıf engiziletinin málimdedi.
«4 qańtardan bastap – elektrondyq bılet júıesi, al 14 qańtardan - Ádilet mınıstrliginde tirkegennen keıin saralanǵan tarıf iske qosylady. ıAǵnı, 14 qańtar kúni avtobýsqa mindiń, biraq kólik kartań bolmasa, 140 teńge tóleısiń nemese kólik kartasyn alasyń. Biz kartany avtobýstyń ishinde satyp alýǵa bolatyn múmkindik jasaýǵa tyrysamyz, biraq kondýktordan emes, basqa adamnan», - dep túsindirdi qala ákimi.
Esterińizge sala keteıik, 2019 jyldyń 3 jeltoqsanynda Semeı qalasynda kólik kartalarynyń jetispeýinen qala avtobýstaryndaǵy elektrondy bılet júıesine birtindep kóshý týraly sheshim qabyldanǵan bolatyn.
