4 qańtarda respýblıka boıynsha qaı joldar jabyq tur

ALMATY. KAZINFORM — «QazAvtoJol» ulttyq kompanııasy eldegi joldardyń qazirgi ahýaly týraly habarlady.

Ulttyq kompanııanyń málimetinshe, 2026 jylǵy 3 qańtar saǵat 15:00–den bastap Aqmola oblysynda aýa raıynyń qolaısyzdyǵyna, naqty aıtqanda kóktaıǵaqqa baılanysty respýblıkalyq mańyzy bar «KAZ02 Astana — Kókshetaý (aınalma jol) — Petropavl — RF shekarasy (Jańa Jol ótkizý pýnkti)» avtojolynyń 18-232-shaqyrym aralyǵynda barlyq kólik túri úshin jyldamdyq rejımi 140 shaq/saǵ-tan 110 shaq/saǵ-qa shekteldi.

Al Shyǵys Qazaqstan oblysynda tirkemesi bar jáne jartylaı tirkemeli júk kólikteriniń qozǵalysy Osınov asýynda ýaqytsha shekteldi. Shekteý «Óskemen — Altaı — Katonqaraǵaı — Rahman qaınary» avtojolynyń 46-66-shaqyrymyndaǵy (Severnoe aýyly — Serebrıansk qalasy) ýchaskesinde qys aıaqtalǵansha saqtalady.

Sonymen birge «Astana — Shiderti — Pavlodar — Ýspenka — RF shekarasy» avtojolyndaǵy jolaıryqtyń kópir qurylymynyń shetki arqalyqtary zaqymdanýyna baılanysty «Qalqaman» jolaıryǵy ýchaskesi jabyldy. Atap aıtqanda, Qalqaman kentine kireberis pen Astana baǵytyna shyǵatyn jol ýaqytsha jabyq.

Eske salaıyq, buǵan deıin sınoptıkter elimizdiń 16 oblysynda 4 qańtar kúni aýa raıyna baılanysty eskertý jasaǵan edi.