4-qabattan tósek jaımalaryn baılap túspek bolǵan shymkenttik qulap ketti
ShYMKENT. QazAqparat - Shymkentte er adam tórtinshi qabattan qulap ketti. Túrli dene jaraqatyn alǵan turǵyn qalalyq aýrýhanaǵa jetkizildi, dep habarlaıdy QazAqparat tilshisi.
Keleńsiz oqıǵa búgin túske taıaý Aıbergenov kóshesinde boldy. Oqıǵa kýágerleriniń aıtýynsha, tórtinshi qabattyń terezesinen bir-birine baılanǵan tósek jaımalary ilinip turǵan. Soǵan qaraǵanda, qulaǵan azamat syrtqa tereze arqyly shyqpaq bolǵan. Alaıda óziniń salmaǵyn esepke almaı, táýekelge barǵany belgili boldy.
Oqıǵa ornyna tártip saqshylary kelip, jedel járdem shaqyryldy. Terezeden túsken turǵyn tez arada qalalyq jedel járdem aýrýhanasyna jatqyzyldy. Dárigerler naýqastyń birneshe jeri synǵanyn, endi uzaq ýaqyt emdeletinin aıtady.
Artynsha tártip saqshylary keleńsiz oqıǵanyń sebep-saldaryn aıtyp berdi. Belgili bolǵandaı eki er adam qaladaǵy kópqabatty úılerdiń birinen bir túnge páter jaldaǵan. Ol jerde kóńil kóterip, túrli ishimdikter ishken. Al, tańerteń olardyń biri esikti syrtynan qulyptap, ketip qalypty. Úıge qamalyp qalǵan ekinshi azamat terezeden shyǵýǵa tyrysyp, qulap ketken.
Polıtsııa oqıǵanyń tolyq mán-jaıyn áli de tekserip jatyr.
