4-qabattan sekirmek bolǵan: ShQO turǵyny áıeldi sýıtsıdten qutqardy
ÓSKEMEN. QazAqparat – Shyǵys Qazaqstan oblysy Kýrchatov qalasynda Ulttyq ulan sarbazy sýıtsıd jasamaq bolǵan áıeldi qutqaryp qaldy, dep habarlaıdy QazAqparat tilshisi.
Kýrchatov qalasyndaǵy 3514 áskerı bólimniń aǵa serjanty Dýman Boǵasbaev 5 mamyr kúni saǵat 19:30 shamasynda óz úıiniń balkonan qarama-qarsy ornalasqan eski úıdegi áıeldi baıqap qalady. Ol qıraǵan eski úıdiń 4-qabatynan tómenge sekirýge oqtalyp turǵan eken. Birden polıtsııaǵa habar berip, ózi dereý sol úıge júgirgen.
Ǵımarattyń artqy jaǵynan aınalyp 4-qabatqa kóterilgen aǵa serjant, aıaǵynyń ushymen jaqyndap kelip, sekirýge daıyndalǵan áıeldi ishke tartyp kirgizgen. Ony qaýipsiz jerge shyǵaryp alǵannan keıin, oqıǵa ornyna polıtsııa qyzmetkerleri de kelgen.
«Shynymdy aıtsam, bul jaǵdaıda áıelmen sóılesýge, qatelik jasamaýǵa shaqyrýǵa ýaqyt bolǵan joq. Óz ómirine balta shappaı turǵanda, shapshań qımyldaýǵa týra keldi», - deıdi Dýman Boǵasbaev.
Qazirgi tańda quzyrly organdar áıeldi sýıtsıdke ne ıtermelegenin anyqtap jatyr.
